Rabitə və informasiya texnologiyaları naziri Əli Abbasov dünyanın aparıcı ali təhsil müəssisələrindən olan Kanadanın Vaterloo Universitetinin (VU) prezidenti Feridun Hamdullahpurla görüşmüşdür. Azərbaycan Prezidentinin sərəncamı ilə 2013-cü ilin ölkəmizdə “İnformasiya-kommunikasiya texnologiyaları ili” elan edilməsinə diqqət çəkən nazir İKT sahəsində görülən işlər, bu sahədə aparılan islahatlar və perspektivlər barədə qonağı məlumatlandıraraq, sektorun inkişaf tempinin ildən-ilə yüksəldiyini vurğulamışdır.

Rabitə və İnformasiya Texnologiyaları Nazirliyindən aldığımız məlumatda bildirilir ki, ölkəmizdə İKT sahəsinin prioritet elan edilməsini, o cümlədən İnformasiya Texnologiyaları Universitetinin yaradılmasını təqdirəlayiq hal kimi dəyərləndirən Feridun Hamdullahpur qarşılıqlı təcrübə imkanlarına da toxunmuşdur. Vaterloo Universitetində təhsil alan 30-a yaxın azərbaycanlı tələbənin əldə etdiyi göstəricilərdən məmnunluğunu ifadə edən qonaq rəhbərlik etdiyi təhsil müəssisəsində informasiya texnologiyaları, innovasiyalar sahəsində müxtəlif ixtisaslar üzrə təhsil alan gənclərin gələcəkdə öz ölkələrinin iqtisadi inkişafına töhfə verə biləcəyinə əminliyini bildirmişdir.

Azərbaycanda yeni fəaliyyətə başlayan İnformasiya Texnologiyaları Universitetinin formalaşmasına VU-nun yaxından dəstək vermək istəyindən söz açan Feridun Hamdullahpur bu məqsədlə müəyyən kurrikulumları Rabitə və İnformasiya Texnologiyaları Nazirliyinə qeyd-şərtsiz təqdim etməyə, eyni zamanda təhsil müəssisələri arasında sıx münasibətlərin qurulması istiqamətində müəllim və tələbə mübadiləsinin həyata keçirilməsinə hazır olduqlarını vurğulamışdır.

Bu təşəbbüsləri yüksək qiymətləndirən nazir Əli Abbasov universitetin gələcək fəaliyyətinin təşkilində Kanada, xüsusilə də Vaterloo Universitetinin təcrübəsinin nəzərdən keçiriləcəyini, həmçinin qarşı tərəflə müzakirələr əsasında birgə fəaliyyət planının hazırlanacağını bildirmişdir.

Samirə ƏLİYEVA,

“Xalq qəzeti”