Xəbər verdiyimiz kimi, İstanbulda TÜYAP sərgi və konqres mərkəzində Türkiyədən və dünyanın bir çox ölkəsindən 700 nəşriyyatın iştirakı ilə 32-ci beynəlxalq kitab sərgisi keçirilir.

Azərbaycan Mədəniyyət və Turizm Nazirliyi ilə ölkəmizin İstanbuldakı baş konsulluğunun təşkil etdikləri və ulu öndər Heydər Əliyevin zəngin həyat və fəaliyyəti, Prezident İlham Əliyevin həyata keçirdiyi islahatlardan bəhs edən kitablar, klassiklərimizin, müasir yazıçı və şairlərimizin 245 əsərinin təqdim olunduğu stend sərgiyə gələnlərin böyük marağına səbəb olmuşdur.

Sərgi çərçivəsində Azərbaycan ədibləri və ədəbiyyat tənqidçilərinin iştirakı ilə “Sözün iki qanadı-Məhsəti Gəncəvi, Nigar Rəfibəyli” mövzusunda konfrans keçirilmişdir. Çıxış edən xalq yazıçısı Anar, AMEA-nın müxbir üzvü Rafael Hüseynov və Milli Məclisin deputatı Qənirə Paşayeva XII əsrdə yaşamış görkəmli Azərbaycan şairəsi Məhsəti Gəncəvidən XX əsr poeziyamızın tanınmış nümayəndəsi Nigar Rəfibəyliyə qədər olan dövrdə qadın nəzminin keçdiyi yoldan bəhs etmişlər. Qeyd olunmuşdur ki, 2013-cü ildə UNESCO  Baş Konfransının 36-cı sessiyasında Məhsəti Gəncəvinin 900 illik yubileyinin dünya səviyyəsində qeyd edilməsi haqqında qərar qəbul edilmişdir. Doqquz əsrlik fərqlə yaşayıb-yaratmış hər iki şairənin əsərlərində qadın ləyaqəti və hüquqları da geniş yer almışdır.   

Konfransdan sonra muğam üçlüyünün konserti olmuşdur.

Azərbaycanın İstanbuldakı baş konsulu Həsən Zeynalov və Azərbaycan mədəniyyət və turizm nazirinin müavini Vaqif Əliyev tədbirlərdə iştirak etmişlər.

Oqtay BAYRAMOV

AzərTAc-ın xüsusi müxbiri

İstanbul