Azərbaycan Respublikası Prezidentinin “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı” haqqında 9 aprel 2013-cü il tarixli sərəncamına uyğun olaraq Rabitə və İnformasiya Texnologiyaları Nazirliyi yeni internet texnologiyalarının yaradılması istiqamətində işləri dəstəkləməkdə davam edir.

Bu barədə nazirliyin mətbuat xidməti məlumat yayıb. Nazirliyin dəstəklədiyi “Dilmanc” layihəsi çərçivəsində şifahi nitqi mətnə çevirən “Dilmanc” imla sisteminin yeni versiyası yaradılıb. İstifadəçilər həmin sistemin yeni versiyasını layihənin “www.dilmanc.az” səhifəsindən öz kompyuterlərinə yükləyə bilərlər (dilmanc.az/dilmanc-imla). Əvvəlki versiyadan fərqli olaraq, bu versiyada istənilən redaktorda (Microsoft Word, Notepad və s.) işləmək imkanı yaradılıb.

Bundan əlavə, kursoru istənilən mətn pəncərəsinə ( brauzerin axtarış kriteriyası yazılan pəncərəsi, elektron cədvəllərin xanası və s.) qoymaqla mətn daxil etmək mümkündür. Qeyd edək ki, “Dilmanc” layihəsi Azərbaycan dili üçün yeni texnologiyaların yaradılması istiqamətində işləri davam etdirir.

M.MÜKƏRRƏMOĞLU,
“Xalq qəzeti”