Lord Freyzer Azərbaycan ilə Britaniya arasında mədəni və humanitar təmasların genişlənməsi işinə böyük töhfələr vermişdir.

Bu sözləri Londonda Lord Freyzerin xatirə gecəsində iştirak edən  İngiltərə-Azərbaycan Cəmiyyətinin ölkəmiz tərəfindən həmsədri, professor Nərgiz Paşayeva AzərTAc-a müsahibəsində demişdir.

Professor bildirmişdir ki, mərhum həmsədr Lord Freyzerin həm cəmiyyətin fəaliyyətində həm də hər iki ölkə arasındakı ikitərəfli münasibətlərin inkişaf etdirilməsində əhəmiyyətli rolu olmuşdur.

Lord Freyzerin Bakı səfəri haqqında məlumat verən N.Paşayeva onun səhhətinin yaxşı olmamasına baxmayaraq, ölkəmizin ictimai və sosial həyatı ilə yaxından maraqlandığını, ömrünün son günlərində belə uğurlu fəaliyyətlərindən qalmadığını diqqətə çatdırmışdır. Lord Freyzer kimi şəxsiyyətlərin təkcə bir xalq üçün deyil, dünya üçün əhəmiyyətli olduğunu deyən N.Paşayeva, onların bütün bəşəriyyəti və insanları sevdiyini vurğulamışdır. O, tarixdə bu cür şəxsiyyətlərin çoxalmasına ümid bəslədiyini diqqətə çatdırmışdır.

Həmsədrlik etdiyi cəmiyyətin fəaliyyəti və gələcək planları haqqında da məlumat verən N.Paşayeva humanitar, mədəni, təhsil və başqa sahələrdə layihələrin davam edəcəyini bildirmişdir. Ölkələrimiz arasındakı münasibətlərin daha da inkişaf etdirilməsinin cəmiyyətin ən böyük məqsədlərindən olduğunu deyən N.Paşayeva gələcəkdə də uğurların daha da artacağına ümidvar olduğunu diqqətə çatdırmışdır. Qeyd edilmişdir ki, İngiltərə-Azərbaycan Cəmiyyəti hər iki ölkədə sevilir və nüfuza malikdir. Nüfuz qazanmağın asan olmadığını bildirən professor, bu etimadın cəmiyyət tərəfindən gələcəkdə də doğruldulacağına əminliyini ifadə etmişdir.

Orxan İSMAYILOV,

AzərTAc-ın xüsusi müxbiri

London