Oktyabrın 25-də Azərbaycan Tələbə Gənclər Təşkilatları İttifaqının (ATGTİ) qərargahında ATGTİ və “PAŞA Bank”ın birgə həyata keçirdikləri “Mən “PAŞA Bank” təqaüdçüsüyəm” adlı təqaüd proqramının qalibləri mükafatlandırılmışlar.

Tədbirdə ATGTİ-nın icraçı direktoru Şəmsi Gülverdi və “PAŞA Bank” korporativ və kommunikasiya departamentinin direktoru Sona Abbasova çıxış etmişlər.

İkinci ildir ki, keçirilən təqaüd proqramının məqsədi iqtisadiyyat ixtisası üzrə təhsil alan tələbələrin təhsilinə və onların şəxsi inkişafına dəstək olmaqdır.

Bildirilmişdir ki, proqram çərçivəsində tədris ilinin əvvəlindən etibarən ATGTİ və “PAŞA Bank”ın birgə dəstəyi ilə iqtisadiyyat ixtisası üzrə təhsil alan tələbələr arasında müsabiqə keçirilmişdir. Müsabiqə əsasında on iki tələbə seçilmişdir.

Sonra seçilmiş on iki tələbənin hər birinə diplom və 100 manat məbləğində pul mükafatları təqdim olunmuşdur.

AzərTA