AMEA-nın prezidenti, akademik Akif Əlizadə gündəlikdə ilk təqdim olunan “Yerin daxili strukturlarının və dinamikasının təkamülündə deformasiya proseslərinin rolu” adlı məruzənin əhəmiyyətindən danışmışdır. O bildirmişdir ki, Geologiya İnstitutunun alimləri bu istiqamətdə tədqiqatlarını genişləndirir, mühüm elmi nəticələr əldə edirlər.

Həmin nəticələri əhatə edən məruzəni Rəyasət Heyətinin müzakirəsinə Geologiya İnstitutunun tektonofizika və geomexanika şöbəsinin rəhbəri, AMEA-nın müxbir üzvü Hətəm Quliyev təqdim etmişdir. Əldə olunmuş nəzəri nəticələri Rəyasət Heyəti bəyənmişdir. Geologiya İnstitutunda Yerin təkamülünün müasir modellərinin yaradılması istiqamətində elmi tədqiqatların genişləndirilməsi və həyata keçirilməsi tövsiyə edilmişdir.

AMEA-nın vitse-prezidenti, akademik İbrahim Quliyev akademiyada elmi müəssisələrin direktorlarından ibarət şuranın təsis edilməsi zərurətindən danışmışdır. Məsələ müzakirə olunduqdan sonra AMEA Elmi Müəssisələrinin Direktorları Şurası təsis edilmiş, həmçinin, şuranın əsasnaməsi və tərkibi təsdiq olunmuşdur. AMEA-nın prezidenti, akademik Akif Əlizadə şuranın sədri təyin edilmişdir.

Müzakirəyə təqdim olunan növbəti məsələ AMEA-nın Gənc Alim və Mütəxəssislər Şurası barədə olmuşdur. Akademik A.Əlizadə bildirmişdir ki, son zamanlar akademiyada həyata keçirilən islahatlar həmçinin gənclərin intellektual potensialının inkişafı, onların daha geniş miqyasda elmi və elmi-təşkilati fəaliyyətə cəlb edilməsi siyasətinə xidmət edir.

AMEA-nın akademik-katibi və müxbir üzvü, professor Rasim Əliquliyev müəssisə və təşkilatlarda Gənc Alim və Mütəxəssislər şuralarının təsis olunmasının vacibliyini vurğulamışdır. Məsələ Rəyasət Heyəti tərəfindən bəyənilmiş və  Azərbaycan Milli Elmlər Akademiyasının Gənc Alim və Mütəxəssislər Şurasının yaradılması tövsiyə olunmuşdur. AMEA-nın elmi müəssisə və təşkilatlarının rəhbərlərinə bu il noyabrın 30-dək gənc alim və mütəxəssislər şuralarının yaradılması tapşırılmışdır. Dekabr ayının 31-dək isə həmin şuraların səlahiyyətli nümayəndələrinin iştirakı ilə AMEA Gənc Alim və Mütəxəssislər Şurasının təsis yığıncağının keçirilməsi nəzərdə tutulur.

R.Əliquliyev iclas iştirakçılarını “AMEA Rəyasət Heyəti Mərkəzi aparatında və tabeliyində olan elmi müəssisə və təşkilatlarda kargüzarlıq fəaliyyətinin təşkilinə dair Təlimat” ilə tanış etmişdir. Təlimat Rəyasət Heyəti tərəfindən qəbul olunmuşdur.

AMEA-nın Humanitar və İctimai Elmlər Bölməsinin akademik-katibi, AMEA-nın müxbir üzvü Kamal Abdullanın çıxışı əsasında “M.F.Axundzadə Ensiklopediyası”nın hazırlanmasına dair redaksiya heyətinin tərkibi təsdiq olunmuş, həmçinin, Milli Azərbaycan Tarixi Muzeyi, Ədəbiyyat və Folklor institutlarının elmi şuralarının tərkibində qismən dəyişiklik edilmişdir. AMEA-da aparılan islahatların davamı olaraq Dilçilik İnstitutunun yeni strukturu müəyyən olunmuş, Ədəbiyyat İnstitutunda Azərbaycan mühacirət ədəbiyyatı şöbəsi yaradılmışdır. AMEA-nın müxbir üzvü Arif Məlikovun anadan olmasının 80, AMEA-nın müxbir üzvü Teymur Kərimlinin isə 60 illik yubileyləri ilə əlaqədar bəzi tədbirlərin keçirilməsi barədə qərar qəbul edilmişdir.

İclasda digər məsələlərə də baxılmışdır.

R.TAHİR,

 “Xalq qəzeti”