Səbail Rayon İcra Hakimiyyəti Gənc Tamaşaçılar Teatrında Beynəlxalq Müəllim Günü münasibəti ilə ənənəvi toplantı keçirmişdir.

Səbail Rayon İcra Hakimiyyətinin başçısı Asif Əsgərov rayon müəllimlərini təbrik etmiş, onlara yeni uğurlar arzulamışdır. Başçı ulu öndər Heydər Əliyevin Azərbaycan təhsilinə olan diqqət və qayğısından danışmış,  son illər respublikamızda tikilən və əsaslı təmir olunan təhsil müəssisələri, təhsil işçilərinin sosial müdafiəsinin möhkəmləndirilməsi, rayonun təhsil müəssisələrinin uğurları barədə məlumat vermişdir. A.Əsgərov qeyd etmişdir ki, ölkə başçısının sərəncamı ilə son 3 ildə Beynəlxalq Müəllim Günü ərəfəsində rayonun orta təhsil müəssisələrinin müəllimlərindən 7  nəfər “Tərəqqi” medalına layiq görülmüş, 5  nəfərə “Əməkdar müəllim” adı verilmişdir. 

Bildirilmişdir ki, yay aylarında rayondakı 7 və 163 saylı orta məktəblərin binaları, 190 saylı orta məktəbin isə akt və idman zalı əsaslı təmir olunmuşdur. Məktəblər lazımi avadanlıq və dərs vəsaiti ilə təchiz olunmuşlar. Bibiheybət qəsəbəsindəki 70 saylı uşaq bağçasının əsaslı təmiri, bağça üçün əlavə musiqi zalı və 3 otağın tikintisi də başa çatdırılmışdır.

20-ci yaşayış sahəsində yerləşən “Turac” uşaq bağçasında əsaslı təmir davam etdirilir. Bundan əlavə, Badamdar qəsəbəsindəki 136 saylı körpələr evi-uşaq bağçası Heydər Əliyev Fondunun təşəbbüsü ilə əsaslı təmir olunmuş və sentyabrın 26-da Azərbaycan Respublikasının birinci xanımı Mehriban Əliyeva və qızı Arzu Əliyevanın iştirakı ilə açılış mərasimi keçirilmişdir.

Qeyd olunmuşdur ki, bütün bu işlər təhsilin səviyyəsinin yüksəlməsinə əlverişli şərait yaradır. 6 saylı orta məktəb və 160 saylı klassik gimnaziya artıq ikinci dəfə “Ən yaxşı ümumtəhsil müəssisəsi” müsabiqəsinin,  rayonun 6 müəllimi isə “Ən yaxşı müəllim” müsabiqəsinin qalibləri  sırasında olmuşlar. 19 məzun qızıl medala layiq görülmüş, 927 nəfər tələbə adı qazanmışdır.

Çıxış edənlər təhsil işçilərinə göstərilən diqqət və qayğıya görə dövlət başçısına öz minnətdarlıqlarını bildirmiş, əmin etmişlər ki,  yeni nəslin təlim-tərbiyəsi işinə töhfələrini artıracaqlar.  

Sonda bir qrup qabaqcıl təhsil işçisinə Səbail Rayon İcra Hakimiyyətinin qiymətli hədiyyələri təqdim olunmuşdur.

R.TAHİR,

 “Xalq qəzeti”