Yeni dərs ilinin başlanması Qazax rayonu üçün xüsusilə əlamətdar olmuşdur. Həmin gün müəllim və şagirdlər, valideynlər ikiqat sevinc hissi yaşamışlar. Belə ki, Bilik Günündə rayonun Daş Salahlı kənd 2 saylı tam orta məktəb (640 şagird yerlik), Çaylı kənd 2 saylı tam orta məktəb (640 şagird yerlik), Ürkməzli kənd tam orta məktəb (220 şagird yerlik), Xanlıqlar kənd ümumi orta məktəbi (180 şagird yerlik) üçün tikilmiş yeni binalar istifadəyə verilmiş, Xanbağı kənd tam orta məktəbi (200 şagird yerlik) isə əsaslı şəkildə təmir olunmuşdur.

Rayon icra hakimiyyətinin başçısı Ayaz Əsgərov yeni məktəb binalarının açılış mərasimində iştirak etmişdir.

Xanbağı kənd tam orta məktəb binasının açılış mərasimində çıxış edən başçı Azərbaycan dövlətinin  təhsilə böyük qayğı və diqqət göstərməsindən söz açmışdır. Müəllim və şagirdləri, valideynləri, bütün kənd sakinlərini əlamətdar gün münasibətilə təbrik etmiş, pedaqoji kollektivə uğurlar arzulamışdır. Məktəbin açılışını bildirən qırmızı lent kəsildikdən sonra binaya baxış keçirilmişdir. Tədbir iştirakçıları yeni sinif otaqlarına, idman zalına, kompyuter və müəllim otaqlarına baxmışlar. Tanışlıqdan sonra məktəbin təmir-bərpa işləri yüksək qiymətləndirilmişdir.

Ayaz Əsgərov Çaylı kəndində inşa edilmiş yeni məktəb binasının açılışında da iştirak etmişdir. Bu münasibətlə keçirilən tədbirdə çıxış edən başçı rayonda məktəb tikintisinin artan templə davam etdiyini vurğulamışdır. Xatırlatmışdır ki, yaxın vaxtlarda  daha 4 yeni məktəb binasının tikintisinə başlanacaqdır.

Məktəbin direktoru Abbas Carçıyev çıxışında  yeni məktəb binasının tikintisinə görə ölkə başçısına müəllim kollektivi və kənd sakinləri adından öz dərin minnətdarlığını bildirmişdir.

Ürkməzli kəndində də  uzun illərdən sonra yeni məktəb binası öz qapılarını müəllim və şagirdlərin üzünə açmışdır. Başçı Ayaz Əsgərov və  Milli Məclisin deputatı Əhməd Vəliyev çıxışlarında müəllim və şagirdləri bu münasibətlə təbrik etmişlər. Məktəbin sinif otaqları, idman və akt zalları, kitabxana və laboratoriyaları ilə tanış olan tədbir iştirakçıları tikinti işlərini yüksək qiymətləndirmişlər.

Həmin gün Daş Salahlı kənd 2 saylı tam orta və Xanlıqlar kənd ümumi orta məktəb binalarının da açılışı olmuşdur.

H. QASIMOV,

 “Xalq qəzeti”nin  bölgə müxbiri