Mərkəzi Seçki Komissiyasının (MSK) qarşıdan gələn prezident seçkiləri ilə əlaqədar hazırladığı “Müşahidəçilər üçün yaddaş” kitabçası işıq üzü görmüşdür.

MSK katibliyinin media və ictimai əlaqələr şöbəsindən AzərTAc-a bildirilmişdir ki, yaddaş kitabçasında müşahidə aparılmasının prinsipləri, müşahidəçilərin hüquq və vəzifələri öz əksini tapmışdır. Kitabçada müşahidəçilərin riayət etməli olduqları, həmçinin onlara qanunla qadağan edilən məsələlər barədə də ətraflı məlumatlar verilmişdir.

MSK-nın maarifləndirmə proqramına uyğun olaraq nəşr edilmiş “Müşahidəçilər üçün yaddaş” kitabçası Seçki Məcəlləsinin və Komissiyanın təsdiq etdiyi normativ xarakterli aktlar əsasında hazırlanmışdır.