Hər il olduğu kimi,növbəti tədris ilində də məktəblərin dərsliklərlə təmin olunmasında problem yaranmayacaq.

Yeni dərs ilinə II, IV, VI, VIII, IX və XI siniflər üçün 139 adda 4 milyon 11 min nüsxə dərslik və müəllimlər üçün metodik nəşr dövlət vəsaiti hesabına çap edilərək ümumtəhsil məktəblərinin istifadəsinə veriləcək. VI sinif dərslikləri ilk dəfə olaraq kurrikulum əsasında hazırlanıb. IX sinfin “Alman dili” dərsliyi də yeni hazırlanıb. Digər dərsliklər əvvəlki nəşrlər üzərində redaktə işi aparılmaqla çap olunub.

Yeni təhsil proqramlarının (kurrikulumlar) VI siniflərdə də tətbiqi ilə əlaqədar müəllimlərin hazırlığına başlanılıb. Bu dərs ilində təlimin keyfiyyəti ilə bağlı monitorinqlərin aparılmasına xüsusi diqqət yetiriləcək, nəticədən asılı olaraq müvafiq təkliflər hazırlanacaq. Yeniliklərdən biri də ondan ibarətdir ki, bu il ilk özəl peşə-ixtisas təhsili müəssisəsi olan Bakı Sahibkarlıq Peşə Məktəbinə qəbul aparılacaq.

Bu tədris ilindən başlayaraq ilk peşə-ixtisas təhsili müəssisələrində təhsil almaq istəyən şəxslər sənədlərini onlayn rejimdə təqdim edə biləcəklər. Bu proses www.psds.edu.az saytı vasitəsilə aparılacaq. Eyni zamanda, qeyd olunan sayt vasitəsilə həm ilk peşə-ixtisas təhsili müəssisələri, həm də peşələr və qəbul qaydaları haqqında məlumat əldə etmək mümkün olacaq.

Yeni tədris ilində Təhsil Nazirliyi bir sıra qurumlarla, o cümlədən işəgötürən təşkilatlarla kadr hazırlığı istiqamətində birgə layihələr həyata keçirəcək. Belə ki, Bakı şəhərində yerləşən bir neçə ilk peşə-ixtisas təhsili müəssisəsində tanınmış şirkətlərlə birgə və beynəlxalq əməkdaşlıq çərçivəsində resurs mərkəzlərinin yaradılması, eləcə də müvafiq kursların təşkili nəzərdə tutulur.

Yeni dərs ilində orta ixtisas təhsili müəssisələri üçün 13 adda 17800 nüsxə dərslik, dərs vəsaiti və metodik vəsait (elektron versiyaları ilə birgə) ilk dəfə olaraq hazırlanıb nəşr edilmiş və orta ixtisas təhsili müəssisələrinə paylanacaq.

M.MÜKƏRRƏMOĞLU,

 “Xalq qəzeti”