Avqustun 23-də Qəbələ şəhərində “İbtidai təhsil-yeni baxışlar, təcrübələr və perspektivlər” mövzusunda Beynəlxalq konfrans başlanmışdır.

AzərTAc xəbər verir ki, Avropa Azərbaycan Cəmiyyətinin təşkilatçılığı ilə keçirilən konfransda respublikamızın müxtəlif məktəblərindən 25 ibtidai sinif müəllimi iştirak edir.

Konfransın ilk günündə Azərbaycan müəllimləri Avstraliya, Türkiyə, Böyük Britaniya və Ukraynadan olan həmkarları ilə təcrübələrini bölüşmüş və inkişaf strategiyalarını müzakirə etmişlər.

Konfransda “İbtidai sinif müəllimlərinin qarşısında duran vəzifələr: beynəlxalq müqayisələr”, “XXI əsr üçün kompetent müəllim kimdir? 28 ölkədə tətbiq olunan Beynəlxalq Addım-Addım Assosiasiyasının müəllimlər üçün yaratdığı peşəkarlıq standartları”, “İbtidai sinif müəlliminin peşəkar keyfiyyətləri” mövzularında məruzələr dinlənilmiş, müzakirələr aparılmışdır.

İbtidai təhsillə bağlı beynəlxalq konfransın keçirilməsi təşəbbüsü yüksək qiymətləndirilmiş, ölkəmizdə müvafiq mövzuda ilk dəfə təşkil edilən bu tədbirin böyük əhəmiyyət daşıdığı vurğulanmışdır.

 Avqustun 24-25-də isə konfransda “İnteraktiv nağıldanışma texnikası: dialoji oxu üsulu oxucunu formalaşdırmağa necə kömək edə bilər”, “İbtidai sinif müəllimlərinin peşəkarlığının artırılması və təkmilləşdirilməsində mentorluq yanaşması”, “Azərbaycan Respublikasında yeni dərslik siyasəti və yeni siyasətin formalaşması və həyata keçirilməsində orta məktəb müəlliminin rolu”, “İbtidai sinifdə bacarıqların formalaşdırılmasına yeni baxışlar və müxtəlif strategiyalar”, “İbtidai sinif müəllimlərinin gündəlik təcrübəsində sosial bacarıq və kompetensiyaların formalaşdırılması”, “İbtidai təhsildə sosial bacarıqların formalaşması” mövzularında məruzələr dinləniləcəkdir.

Konfransın sonunda tədbir iştirakçılarına sertifikatlar təqdim ediləcəkdir.