Bu il ali məktəblərə keçirilən qəbul imtahanlarında yüksək uğurlar əldə edən  gənclər arasında Binəqədi rayonundakı orta məktəblərin  məzunları da olmuşdur. Onların sırasında  Azərbaycanın ali məktəbləri ilə yanaşı, xarici ölkələrin ali təhsil müəssisələrinə daxil olanlar da var.

Belələrindən  biri də dünyanın nüfuzlu ali məktəblərindən sayılan  Rusiya Federasiyası Xarici İşlər Nazirliyinin Moskva Beynəlxalq Əlaqələr Universitetinin tələbəsi adını qazanmış Murad Məmmədovdur. Həmin ali məktəbin beynəlxalq iqtisadi münasibətlər fakültəsinin tələbəsi adını qazanan  M. Məmmədov rayondakı T.Heybətov adına 126 nömrəli orta məktəbi bitirmişdir. O, bu il mayın 29-da keçirilən test imtahanlarında rus bölməsində II ixtisas qrupu üzrə respublikada yüksək nəticə göstərərək 677 bal toplamışdır.

M. Məmmədovun adı çəkilən universitetə qəbulunu fərqləndirən əsas cəhət həmin ali məktəbdə Azərbaycan Prezidenti  İlham Əliyevin təhsil alması və orada pedaqoji fəaliyyət göstərməsidir.

Binəqədi Rayon İcra Hakimiyyətinin başçısı Xaləddin İsgəndərov tələbə adını qazanmış Murad Məmmədovu, onun valideynlərini, bitirdiyi orta məktəbin direktorunu qəbul etmişdir. Söhbət zamanı başçı belə bir nüfuzlu ali məktəbə qəbul olmağı Muradın həyatında ən əlamətdar hadisə kimi qiymətləndirmişdir. X.İsgəndərov həmçinin vurğulamışdır ki, dövlətimizin başçısı cənab İlham Əliyevin məzunu olduğu və çalışdığı ali məktəbin tələbəsi olmaq böyük  sevinc hissi doğurmaqla yanaşı, həm də Muradın məsuliyyətini birə-beş artırır.

Binəqədi Rayon İcra Hakimiyyətinin başçısı təhsilə hərtərəfli qayğı göstərən, gənclərin xaricdə təhsil almasına güclü dəstək verən Azərbaycan Prezidentinin etimadını doğrultmağın, xaricdə təhsil aldığı müddətdə Azərbaycanın adını uca tutmağın, öz biliyi, bacarığı və çalışqanlığı ilə ölkəmizi layiqincə təmsil etməyin  vətəninə və dövlətinə sadiq hər bir azərbaycanlı gəncin ən ümdə vəzifəsi olduğuna toxunmuş, Murad Məmmədova tövsiyələrini vermişdir.

Xaləddin İsgəndərov rayondan ali məktəblərə qəbul olan məzunlarla sentyabr ayında görüşəcəyini vurğulayaraq, Murad Məmmədovla indi görüşməsini bu  gəncin həftəsonu Rusiya Federasiyasına getməsi ilə əlaqədar olduğunu bildirmişdir.

V. BAYRAMOV,

“Xalq qəzeti”