Təhsil naziri ali məktəblərə qəbul imtahanlarında 700 bal toplamış abituriyentləri əldə etdikləri uğurlara görə təbrik etmiş, onların gələcəkdə yüksək səviyyəli mütəxəssis kimi yetişəcəklərinə inandığını diqqətə çatdırmışdır.

Nazirliyin mətbuat xidmətinin yaydığı məlumatda deyilir ki, abituriyentlərin belə möhtəşəm nailiyyət qazanmasında təhsil aldıqları məktəblərin, müəllimlərin mühüm rolunu vurğulayan nazir onların ailələrinə və valideynlərinə minnətdarlığını bildirmişdir.

Abituriyentlər təhsil aldıqları məktəblər, müəllimləri və valideynləri haqqında təhsil nazirinə məlumat vermiş, göstərilən diqqətə görə təşəkkür etmişlər. Övladlarının əldə etdiyi yüksək uğurlara görə qürur hissi keçirdiklərini söyləyən valideynlər onların seçdikləri ixtisaslara dərindən yiyələnəcəklərinə əminliklərini ifadə etmişlər.

Görüşün sonunda ali məktəblərə qəbul imtahanlarında ən yüksək nəticə göstərmiş abituriyentlərə Təhsil Nazirliyi adından qiymətli hədiyyələr təqdim olunmuşdur.

                                                                                       Samirə ƏLİYEVA,

“Xalq qəzeti”