ATİ öz fəaliyyəti dövründə beynəlxalq əməkdaşlığa daim önəm vermiş, ölkəmizdə yaşayıb çalışan müxtəlif ölkələrin nümayəndələri ilə görüşlər keçirmişdir. İnstitutda xarici ölkələrin Azərbaycandakı səfirliklərinin birinci katiblərinin iştirakı ilə təşkil edilən tədbirlər də artıq ənənə halını almışdır.

 Bu günlərdə ABŞ-ın ölkəmizdəki səfirliyinin birinci katibi Rocer Riqaud Azərbaycan Turizm İnstitutunun qonağı olmuşdur. Görüş zamanı bir il  əvvəl ölkəmizdə öz missiyasının icrasına başladığını nəzərə çatdıran  cənab Rocer  Riqaud gənc ali təhsil müəssisəsi kimi Azərbaycan Turizm İnstitutunun fəaliyyəti ilə maraqlandığını bildirmişdir. O, turizmin inkişafı fonunda ATİ-nin ali təhsil müəssisəsi kimi tədris prosesində və kadr hazırlığı istiqamətində gördüyü müsbət işlərdən xəbərdar olmaq istəyini açıqlamışdır.

 Qonağın suallarını cavablandıran  ATİ-nin rektoru, tarix elmləri doktoru, professor Cəfər Cəfərov öncə 2006-cı ildən fəaliyyətə başlayan Azərbaycan Turizm İnstitutunun inkişaf strategiyası və beynəlxalq əlaqələri haqqında qısa məlumat vermişdir. Rektor C.Cəfərov söhbət əsnasında xüsusi vurğulamışdır ki, 1 fakültə və 3 ixtisasla ilk tədris ilinə başlayan bu təhsil ocağında hazırda bakalavr səviyyəsi üzrə 11, magistratura, həmçinin doktorantura səviyyəsi üzrə müxtəlif ixtisaslar üzrə kadr hazırlığı həyata keçirilir. O, 2013-2014-cü tədris ilindən etibarən tədris prosesinin 3 fakültədə  təşkil ediləcəyini diqqətə çatdırmışdır. Avstriyanın IMC Krems Tətbiqi Elmlər Universiteti ilə bakalavr və magistratura səviyyəsində ikili diplom proqramı haqqında ətraflı danışan rektor hazırda məzunlarımızın müxtəlif turizm müəssisələrində uğurla çalışdıqlarını, bir qisminin isə ölkəmizdə və xaricdə təhsilini davam etdirdiyini qeyd etmişdir.

Tanışlıq görüşü zamanı qonağa ATİ əməkdaşlarının AHLEI (Amerika Otel Təhsili üzrə İnstitut) təlim kurslarında iştirakı barədə də məlumat verilmişdir. Cənab Rocer Riqaud da öz növbəsində ABŞ-ın turizm müəssisələri ilə ali təhsil müəssisələri arasında əməkdaşlıq istiqamətində aparılacaq mümkün təkliflərin araşdırılacağını diqqətə çatdırmışdır.

Z. BƏŞİRQIZI, “Xalq qəzeti”