İyulun 25-də Heydər Əliyev Fondunun vitse-prezidenti, Rusiyanın Azərbaycanlı Gənclər Təşkilatının sədri xanım Leyla Əliyevanın təşəbbüsü ilə Rusiyanın  dövlət qulluqçuları, Uşaq və Gənclər Təşkilatlarının Milli Şurası idarə heyətinin, Gənclərin İctimai Palatasının üzvlərindən və ali məktəb tələbələrindən ibarət nümayəndə heyəti Azərbaycana səfər çərçivəsində Bakı Slavyan Universitetində (BSU) olmuşdur.

BSU-nun mətbuat xidmətindən AzərTAc-a bildirmişlər ki, qonaqlar universitetin muzeyi, bu ali təhsil ocağında fəaliyyət göstərən Rusiya, Ukrayna, Polşa, Çexiya, Yunanıstan, Türkiyə, Bolqarıstan və Belarusun tədris-mədəniyyət mərkəzləri, müasir standartlar əsasında yenidən qurulmuş kitabxana, zəngin texniki avadanlıqla təchiz edilmiş linqafon zalları, elmi-tədqiqat laboratoriyaları, akt zalı və “Heydər Əliyev məktəbi” Tələbə Teleradio Studiyası ilə tanış olmuşlar.

Universitetin müəllim-tələbə heyətinin rusiyalı qonaqlarla  görüşündə tədris işləri üzrə prorektor, professor Asif Hacıyev  BSU-nun yaranma tarixi, bu ali təhsil müəssisəsinin fakültələri, strukturu, onun zəngin elmi və mədəni həyatı, tələbə gənclər təşkilatı və “Kölgə Kabineti”nin çoxşaxəli fəaliyyəti haqqında ətraflı məlumat vermişdir.

BSU-nun beynəlxalq əlaqələr üzrə prorektoru, professor Sahibə Qafarova, tərbiyə işləri üzrə prorektor, dosent Oqtay Səmədov, beynəlxalq əlaqələr şöbəsinin müdiri Anna Bayramova BSU-nun beynəlxalq layihələrindən, universitetdə fəaliyyət göstərən dil və mədəniyyət mərkəzlərindən, zəngin tələbə həyatından bəhs edərək bildirmişlər ki, bu gün BSU Rusiyanın bir sıra nüfuzlu universiteti ilə sıx əlaqələr qurmuş və bu əlaqələri sürətlə inkişaf etdirməkdədir.

Qonaqlar  BSU-nun Azərbaycanda rus dilinin tədrisi ənənəsinə sadiq qaldığına, slavyan dillərinə qayğı ilə yanaşdığına görə universitetin kollektivinə dərin təşəkkürlərini bildirmiş və  tələbələrlə fikir mübadiləsi aparmışlar. Görüşdə yeni tədris ilində Rusiyanın bir sıra gənclər təşkilatı ilə BSU-nun tələbə gənclər təşkilatı arasında əməkdaşlıq memorandumunun imzalanması qərara alınmışdır.