ARDNŞ-in Sumqayıt Təlim-Tədris Mərkəzində 6 ixtisas üzrə peşə təhsili almış məzunların böyük bir dəstəsinin buraxılış imtahanları  keçirilmişdir.  Azərbaycan Respublikasının Prezidenti İlham Əliyevin tapşırığı üzrə ARDNŞ tərəfindən yaradılaraq ötən ilin sentyabrından fəaliyyətə başlamış Sumqayıt Təlim-Tədris Mərkəzində il ərzində 100 nəfər gənc “Azərikimya” İstehsalat Birliyinin, həmçinin Sumqayıtın sənaye müəssisələrinin daha çox ehtiyac duyduğu müxtəlif peşələr üzrə texniki təhsil almışdır.

Sumqayıtda ilk dəfə olaraq müasir tələblər səviyyəsində yaradılmış mərkəzdə fəhlə ixtisaslarına yiyələnən gənclər seçdikləri peşələr üzrə texniki-nəzəri biliklərə yiyələnməklə yanaşı, müəssisələrdə vaxtaşırı istehsalat təcrübəsi keçmişlər. May ayında STTM-in ilk məzunları - 12 tornaçı müəssisələrdə iki aylıq istehsalat təcrübəsini başa vurduqdan sonra buraxılış imtahanı vermiş və mexaniki-təmir sahələrində ixtisaslarına uyğun işlə təmin edilmişlər.

STTM-in digər qrupları üzrə daha 88 gənc isə may-iyul aylarında Etilen-Polietilen və Mexaniki-təmir zavodlarında, Təmir-quraşdırma İdarəsində iki aylıq istehsalat təcrübəsi keçərək, nəhayət, imtahan komissiyası qarşısında bilik və bacarıqlarını nümayiş etdirmişlər.

İmtahan başlanmazdan əvvəl “Azərikimya” İstehsalat Birliyinin Müşahidə Şurasının sədri, Milli Məclisin deputatı Muxtar Babayev və ARDNŞ-in Təlim-Tədris və Sertifikatnlaşdırma İdarənsinin rəisi Fuad Süleymanov məzunları, STTM-in müəllim və istehsalat təlimi ustalarını ilk böyük buraxılış münasibətilə təbrik etmiş, gənclərə uğurlar arzulamışlar.       Mətbuat nümayəndələrinin də iştirak etdiyi imtahanda məzunlar təhsil müddətində əldə etdikləri nəzəri biliklər və təcrübi vərdişləri ilə istehsalatda uğurla çalışmağa hazır olduqlarını təsdiq edə bilmişlər.

Gənc kadrlar müvafiq peşə dərəcələri ilə “Azərikimya” İstehsalat Birliyinin müəssisələrində, həmçinin ARDNŞ-in digər strukturlarında müvafiq işlə təmin olunacaqlar.

Əli NƏCƏFXANLI,

 “Xalq qəzeti”