Azərbaycanda 2013/2014-cü tədris ili üçün ali təhsil müəssisələri üzrə qəbul planı və dövlət sifarişli ixtisaslar üzrə qəbul aparılacaq yerlərin sayı Azərbaycan Prezidenti yanında Təhsil Komissiyası tərəfindən təsdiqlənərək Tələbə Qəbulu üzrə Dövlət Komissiyasına (TQDK) təqdim edilmişdir.

TQDK-nın mətbuat katibi Elnur Nağızadə APA-ya açıqlamasında demişdir ki, növbəti tədris ili üçün Azərbaycanda ali təhsil müəssisələrinə plan yerlərinin sayı artırılmışdır. Ümumilikdə ali məktəblərə qəbul planı ötən illə müqayisədə 7,5 faiz, dövlət sifarişli ixtisaslar üzrə plan yerlərinin sayı isə ötən ilə nisbətən 3,58 faiz artmışdır. Belə ki, 2013/2014-cü tədris ilində ali məktəblərə tələbə qəbulu üçün 36 537 plan yeri ayrılmışdır.

2012/2013-cü tədris ilində isə respublikanın ali təhsil müəssisələrinə qəbul üçün ayrılan plan yerlərinin sayı 34 098 olmuşdur. Qeyd edək ki, sabah “Abituriyent” jurnalının 3-cü sayı ictimaiyyətə təqdim olunacaq. Burada növbəti tədris ili üçün qəbul planına daxil edilən ixtisasların siyahısı öz əksini tapmışdır.