Lənkəran Dövlət Universitetində “Məzun-2013” adı ilə keçirilən tədbir onun iştirakçıları üçün yaddaqalan olmuşdur.

Universitetin rektoru, fizika-riyaziyyat elmləri doktoru, əməkdar elm xadimi, professor Asəf İsgəndərov ali məktəbi bitirmələri münasibətilə məzunları təbrik etmişdir. O bildirmişdir ki, bu il universiteti 11 ixtisas  üzrə 282 nəfər bitirir.  Ümumiyyətlə, ötən dərs ilində universitetdə 2 minədək tələbə təhsil almış, tədrisin keyfiyyəti yüksəlmişdir. Universiteti indiyədək 28 ixtisas üzrə 5 mindən artıq tələbə bitirmişdir. Məzunların bir qismi elmi dərəcələr alaraq ali məktəblərdə, yaxud digər məsul vəzifələrdə işləyir.

Lənkəran Ağsaqqallar Şurasının sədri Kamal Kələntərli müstəqil Azərbaycanın gələcək qurucuları olan məzunlara ən xoş arzularını bildirmiş və əminlik ifadə etmişdir ki, onlar bundan sonra da ümummilli lider Heydər Əliyevin ideyalarını layiqincə həyata keçirəcəklər. Universitet Valideynlər Şurasının sədri Sərhad Məmmədov ölkədə hər zaman bilikli, işgüzar, vətənpərvər gənc kadrlara ehtiyac olduğunu söyləmiş və məzunlara etimadı şərəflə doğrultmağı arzulamışdır. Valideyn Heybət Mirzəyev universitetdə tələbələrə göstərilən qayğıya görə minnətdarlığını bildirmişdir.

Məzunlar adından Nahid Bağırzadə, Sevinc Şirzadova və Ruslan Mirzəyev çıxış edərək ürək sözlərini söyləmiş, fəaliyyət göstərəcəkləri yerlərdə doğma təhsil ocağının, müəllimlərin adını həmişə uca tutacaqlarını söyləmişlər.

Sonra təhsildə və universitetin ictimai həyatında fərqlənənlərə fəxri fərmanlar verilmişdir.  Tədbirdə Azərbaycan Respublikasının Prezidenti İlham Əliyevə  müraciət qəbul edilmişdir. Tələbə-gənclər bu ilin oktyabr ayında keçiriləcək prezident seçkilərində hamılıqla cənab İlham Əliyevi dəstəkləyəcəklərini bildirmişlər.

Sonda tələbə istedadlar maraqlı konsert proqramı ilə çıxış etmişlər.

“Məzun-2013” tədbirinə Lənkəran şəhər ictimaiyyətinin, təhsil və mədəniyyət müəssisələrinin nümayəndələri də qatılmışlar.

Əli NƏCƏFXANLI,

“Xalq qəzeti”nin bölgə müxbiri