İyunun 29-da Xaçmaz rayonunun Nabran qəsəbəsində Azərbaycan Təhsil İşçiləri Azad Həmkarlar İttifaqı Respublika Komitəsinin “Təhsil” istirahət mərkəzinin açılış mərasimi olmuşdur.

AzərTAc xəbər verir ki, istirahət mərkəzinin açılış mərasimində Təhsil İşçiləri Azad Həmkarlar İttifaqı Respublika Komitəsinin üzvləri, yerli icra hakimiyyətinin nümayəndələri  iştirak etmişlər.

Tədbir iştirakçıları əvvəlcə istirahət mərkəzində yaradılmış şəraitlə tanış olmuşlar. Diqqətə çatdırılmışdır ki, təbiət qoynunda salınmış istirahət mərkəzi eyni vaxtda 260 nəfərə xidmət edə bilər. Mərkəzdə təhsil işçilərinin dincəlmələri üçün müasir mehmanxana binası, koteclər, mini stadionlar, üzgüçülük hovuzu, ilkin tibbi yardım otağı, internet klub istifadəyə verilmişdir.

AHİK-in və Azərbaycan Təhsil İşçiləri Azad Həmkarlar İttifaqı Respublika Komitəsinin sədri, Milli Məclisin deputatı Səttar Mehbalıyev açılış mərasimində çıxış edərək bildirmişdir ki, Nabranda istirahət mərkəzinin istifadəyə verilməsi dövlətimizin təhsil işçilərinə diqqət və qayğısının daha bir göstəricisidir.

Bildirilmişdir ki, ittifaq üzvlərinin, onların ailələrinin sağlamlığına qayğı göstərilməsi, sanatoriya-kurort müalicəsinin və istirahətlərinin təşkil edilməsi üçün tədbirlər bundan sonra da davam etdiriləcəkdir.

“Təhsil” istirahət mərkəzi əsasən yay məzuniyyəti dövründə təhsil işçilərinə xidmət göstərəcəkdir. Mərkəzdə qış mövsümündə də xidmət göstərilməsi üçün müvafiq işlər görülməkdədir.