Gənc Tamaşaçılar Teatrında Azərbaycan Universitetinin ənənəvi Məzun günü qeyd edilmişdir. Mərasimi giriş sözü ilə açan universitetin rektoru, dosent Eldar Qəhrəmanov qonaqları salamlamış, bu təhsil ocağının fəaliyyəti və qazandığı uğurlar barədə məlumat vermişdir.

Tədbirdə Milli Məclisinin üzvləri, Təhsil Nazirliyinin nümayəndələri, ziyalılar, xaricdəki tərəfdaş universitetlərin rəhbərləri, universitetin müəllim, tələbə və magistr heyəti, keçmiş məzunlar və kütləvi informasiya vasitələrinin nümayəndələri iştirak etmişlər.

Qeyd edilmişdir ki, son dövrlərdə ümumrespublika miqyasında keçirilən olimpiadalarda universitetin tələbə və magistrləri xüsusi fəallıq göstərirlər.

Xatırladaq ki, Azərbaycan Universiteti 1991-ci ildən fəaliyyət göstərir. 2006-ci ildən Bolonya prosesinə qoşulan universiteti fəaliyyət göstərdiyi müddət ərzində 3 mindən çox bakalavr, 400-dən çox magistr bitirmişdir. Hazırda bu təhsil müəssisəsində 1066 bakalavr, 96 magistr təhsil alır. Burada 6 kafedra, 10 şöbə fəaliyyət göstərir. Universitetdə 221 müəllim çalışır.

Bu il artıq 19-cu məzun gününü qeyd edən universitetin bakalavr pilləsini 161, magistr pilləsini isə 41 nəfər bitirmişdir. Ötən dövr ərzində sözügedən ali məktəbin məzunları arasında elmi dərəcə alanlar, müxtəlif məsul vəzifələrdə işləyənlər vardır.

Mərasimdə çıxış edənlər məzunlara doğma ali məktəbin adını daim uca tutmağı arzulamış və gənclərin etimadı şərəflə doğruldacaqlarına əminliklərini bildirmişlər.

Məzunlar harada fəaliyyət göstərəcəklərindən asılı olmayaraq, doğma ali təhsil ocağının və müəllimlərinin adına layiq çalışacaqlarını vurğulamışlar.

Sonra məzunlara rəmzi diplomlar verilmişdir.

Məzun günü maraqlı konsert proqramı ilə başa çatmışdır.

Vaqif BAYRAMOV, “Xalq qəzeti”