M.V.Lomonosov adına Moskva Dövlət Universitetinin Bakı Filialının (MDU BF) bir qrup tələbəsi Dənizkənarı Bulvar İdarəsinin, Azərbaycan Respublikası Dövlət Neft Şirkətinin Ekologiya İdarəsinin və İDEA kampaniyasının dəstəyi ilə “Enactus” Beynəlxalq tələbələrarası müsabiqə çərçivəsində yeni layihə həyata keçirməyə başlamışdır.

MDU BF-dən AzərTAc-a  bildirmişlər ki, layihənin məqsədi kimsəsiz gəncləri, aztəminatlı ailələri və internatlardan  olan yeniyetmələri Azərbaycanda az yayılmış, lakin yüksək tələbatı olan landşaft dizaynı ixtisasına dair maarifləndirmək, onları yerlərdə işlə təmin etmək, həmçinin ölkəmizdə bu sahə üzrə yerli mütəxəssislər hazırlamaqdır.

Artıq layihə çərçivəsində təlimlər başlamışdır. Hazırda 12 gənc landşaft dizaynı mövzusunda dərslərdə iştirak edir. Dərslər həm nəzəri, həm də praktiki hissələrdən ibarət olmaqla MDU-nun Moskvadan dəvət olunmuş mütəxəssisləri və Dənizkənarı Bulvar İdarəsinin əməkdaşları tərəfindən keçirilir.

 Layihənin reallaşdırıldığı müddətdə landşaft dizaynının şaquli yaşıllaşdırma növünün Azərbaycanda yayılmaması nəzərə alınaraq gənclərə əsas etibarilə bu mövzuda dərslər keçiləcəkdir.

Tədris kursu sentyabrın sonunadək davam edəcəkdir. Kursun sonunda imtahan təşkil ediləcəkdir. Azərbaycanda landşaft dizaynı sahəsi üçün mütəxəssis hazırlayan təhsil müəssisəsinin yoxluğu  əsas götürülərək imtahanı müvəffəqiyyətlə başa vuran gənclər MDU-nun diplomunu alacaq və müvafiq idarələrdə işlə təmin olunacaqlar.

İndiyədək bu sahə üzrə dövlət sifarişləri xarici şirkətlər və xaricdə təhsil almış mütəxəssislər tərəfindən yerinə yetirilmişdir.

“Enactus” Beynəlxalq tələbələrarası müsabiqə olmaqla dünyanın 38 ölkəsindən 1600 universiteti əhatə edir. Müsabiqə çərçivəsində tələbələr iqtisadiyyat, ekologiya və sosialyönümlü biznes layihələr həyata keçirir. Tələbələr əvvəlcə milli seçim mərhələsində iştirak edirlər. Ölkədaxili müsabiqədə qalib gələn komanda  beynəlxalq səviyyədə yarışır.