Tanınmış alim və ictimai xadim, professor Nizami Cəfərovun “Elm və təhsil” nəşriyyatı tərəfindən çap edilmiş “Açıq məktublar” kitabında bir çox ünlü simalara ünvanlanmış məktublar toplanmışdır.

AzərTAc xəbər verir ki, kitabda müəllifin müxtəlif illərdə elm, mədəniyyət və sənət xadimlərinə ünvanladığı 20-dək məktub yer almışdır.

Professor Rüstəm Kamalın təbirincə deyilərsə, Nizami Cəfərov açıq məktublarında fərqli statuslarda - türkoloq (“Akademik Mirfatıx Zəkiyevə aşıq məktub”), ədəbiyyatşünas və tənqidçi (“Vidadi Babanlıya açıq məktub”, “Yazıçı Afaq Məsuda açıq məktub”), dilçi (“Professor Qəzənfər Kazımova açıq məktub”), tarixçi (“ Akademik İqrar Əliyevə açıq məktub”) çıxış edir. Açıq, bəzən də sərt polemikaya girir, ciddi söhbətdən çəkinmir.

Kitabdakı digər məktublar - yazıçı İsa Hüseynova, yazıçı Elçinə, şairlər Zəlimxan Yaquba, Vaqif Səmədoğluna, professor Yəhya Kərimova, akademiklər Ağamusa Axundova, Vasim Məmmədəliyevə və başqalarına ünvanlanmış məktublar da maraq doğurur.