Azərbaycan Respublikası “Kitab” Cəmiyyəti tərəfindən ümummilli liderin 90 illik yubileyi münasibətilə “Heydər Əliyevin neft strategiyası” miniatür kitabı “İndiqo” mətbəəsində nəfis şəkildə çapdan çıxmışdır.

AzərTAc xəbər verir ki, qılafı dəri materialdan yüksək zövqlə hazırlanmış və ümumilikdə 170 səhifədən ibarət olan miniatür kitab 1994-cü il sentyabrın 20-də dünyanın nəhəng neft şirkətləri ilə bağlanmış və ulu öndər Heydər Əliyevin uğurlu neft strategiyasının əsasını təşkil edən “Əsrin müqaviləsi”nin imzalanması mərasimində ümummilli liderin nitqi ilə başlanır. 

Oxucu son dərəcə yığcam formada tərtib edilmiş bu miniatür kitabda ulu öndərin həmin mərasimindəki nitqi ilə tanış olarkən müqavilənin imzalanmasından keçən 19 ilə yaxın müddətdə ümummilli lider Heydər Əliyevin uzaq gələcəyə hədəflənmiş müdrik neft strategiyasının ölkəmizə və xalqımıza necə böyük uğurlar qazandırdığını bir daha gözləri önünə gətirir.

Bu uğurlar miniatür kitabın ikinci hissəsində yer almış növbəti materialda - 2004-cü il sentyabrın 24-də “Əsrin müqaviləsi”nin imzalanmasının 10-cu ildönümünə həsr olunmuş təntənəli mərasimdə Prezident İlham Əliyevin nitqində bir daha ümumiləşdirilmiş və ulu öndərin müdrik neft strategiyasının miqyasını təsəvvür etməyə imkan vermişdir. Bunu Prezident İlham Əliyevin həmin mərasimdə söylədiyi aşağıdakı fikirlər bir daha təsdiq edir: “10 il bundan əvvəl “Əsrin müqaviləsi”nin imzalanması ilə xalqımızın ümummilli lideri Heydər Əliyevin neft strategiyasının təməli qoyuldu. Ötən dövr ərzində Azərbaycan hərtərəfli inkişaf etdi. Ölkəmiz iqtisadi baxımdan çox böyük nailiyyətlər əldə etdi, siyasi cəhətdən dünya birliyində özünəlayiq yerini tuta bildi. Azərbaycanda çoxlu sosial məsələlər öz həllini tapdı. Bir sözlə, ölkəmiz ötən 10 il ərzində böyük və şərəfli bir yol keçdi".

Miniatür kitabda Azərbaycanın uğurlu neft strategiyasının banisi ümummilli lider Heydər Əliyevin və Prezident İlham Əliyevin rəngli portretləri verilmişdir. Bundan əlavə, kitabın forzasında Azərbaycan paytaxtının qədimliyinin rəmzi olan Qız qalasının və Xəzər dənizində üzən neft platformasının şəkilləri əksini tapmışdır.

Ümumiyyətlə, miniatür kitabda ulu öndər Heydər Əliyevin uğurlu neft strategiyasının ayrı-ayrı məqamlarını özündə əks etdirən, müxtəlif tədbirlərdən çəkilmiş 11 fotoşəkil təqdim edilmişdir.