Azərbaycan Texniki Universitetində (AzTU) idmanın yeddi növü üzrə üç həftədən çox davam edən komanda və şəxsi birincilik yarışları başa çatmışdır.

AzTU-nun mətbuat xidmətindən bildirmişlər ki, universitetin 10 fakültəsinin tələbələri və bu ali məktəbin əməkdaşları arasında keçirilən ümummilli lider Heydər Əliyevin 90 illik yubileyinə həsr olunmuş yarışların qalibləri müəyyən edilmişdir. Mayın 10-da keçirilmiş mükafatlandırılma mərasimində AzTU-nun rektoru, professor Havar Məmmədov komanda yarışlarında və şəxsi birincilikdə yüksək yer tutan idmançıları təbrik etmiş, onlara daha böyük uğurlar arzulamışdır.

H.Məmmədov ulu öndər Heydər Əliyevin ölkəmizə rəhbərlik etdiyi onilliklər ərzində sosial-iqtisadi inkişafla yanaşı, bədən tərbiyəsi və idmanın yüksəlişinə də xüsusi diqqət yetirdiyini vurğulamışdır. Rektor bildirmişdir ki, bu gün Azərbaycan dünya miqyasında həm də idman ölkəsi kimi tanınır. Ulu öndərin bu siyasəti hazırda Prezident İlham Əliyev tərəfindən uğurla davam etdirilir. İdmançılarımız beynəlxalq yarışlarda yüksək pillələri fəth edirlər.

Qaliblərə AzTU-nun diplomları, üzərində ümummilli lider Heydər Əliyevin şəkli olan xatirə medalları, kuboklar təqdim edilmişdir.