Bakı Dövlət Universitetində (BDU) görkəmli oftalmoloq alim, akademik Zərifə xanım Əliyevanın anadan olmasının 90 illik yubileyinə həsr edilmiş gənc alimlərin və tədqiqatçıların “Müasir biologiyanın innovasiya problemləri” mövzusunda III Beynəlxalq elmi konfransı keçirilir.

Açılış mərasimində BDU-nun rektoru, Milli Məclisin deputatı, akademik Abel Məhərrəmov, Elm və innovasiyalar üzrə prorektoru, professor Aydın Kazımzadə dünya şöhrətli oftalmoloq alim, ictimai xadim, Əməkdar Elm Xadimi, tibb elmləri doktoru, akademik Zərifə xanım Əliyevanın şərəfli ömür yolundan, zəngin elmi yaradıcılığından, əsərlərinin əhəmiyyətindən danışmışlar.

Vurğulanmışdır ki, akademik Zərifə xanım Əliyevanın atası Əziz Əliyev nüfuzlu dövlət xadimi olmuşdur. Akademik Zərifə xanım Əliyeva müasir, müstəqil dövlətimizin memarı və qurucusu, bütün mənalı ömrünü doğma Vətənin və xalqın tərəqqisinə həsr etmiş dahi şəxsiyyət, ümummilli lider Heydər Əliyevin sədaqətli ömür-gün yoldaşı olmuşdur. Akademik Zərifə xanım Əliyeva dahi rəhbər Heydər Əliyev siyasətinin layiqli davamçısı Azərbaycan Prezidenti İlham Əliyevin anasıdır.

Akademik Zərifə xanım Əliyevanın elmi fəaliyyəti çox əhatəli olmuşdur. İstedadlı alim oftalmologiyanın aktual mövzularına həsr edilmiş çoxprofilli tədqiqatlar aparmış və dünya elminə əvəzsiz töhfələr vermişdir. Akademik Zərifə xanım Əliyeva müxtəlif göz xəstəliklərinin müalicə və profilaktikasının işlənib hazırlanması üzrə mühüm tədbirlər həyata keçirmişdir. Alim dünyada ilk dəfə peşə patalogiyasını araşdıran elmi-tədqiqat laboratoriyası yaratmış və praktiki olaraq elm aləmində yeni bir istiqamətin - peşə oftalmologiyasının əsasını qoymuşdur. Apardığı tədqiqatların nəticəsində “Göz yaşının axmasının fiziologiyası”, “Gözün və görmə sinir yolunun yaşla əlaqədar dəyişiklikləri” və s. elmi məqalələr və monoqrafiyalar nəşr olunmuşdur.

Natiqlər böyük alim, gözəl və xeyirxah insan akademik Zərifə xanım Əliyevanın əziz xatirəsinin əbədiyaşar olduğunu diqqətə çatdırmışlar. 

BDU-nun Biologiya fakültəsinin dekanı, professor Akif Quliyev “Müasir biologiyanın son nailiyyətləri” mövzusunda məruzə etmişdir.

Beynəlxalq konfransa Azərbaycan, Türkiyə, Böyük Britaniya, Almaniya, İspaniya, Rusiya, Gürcüstan və digər ölkələrdən 130-dan çox məruzə təqdim edilmişdir.

Sonra bölmə iclaslarında müxtəlif mövzularda məruzələr dinlənilmişdir.

Konfrans mayın 8-də başa çatacaqdır.

AzərTAc