Azərbaycan Müəllimlər İnstitutu Ağcabədi filialında ulu öndər Heydər Əliyevin anadan olmasının 90 illiyi ilə əlaqədar olaraq elmi-praktik konfrans keçirilmişdir.

Konfransı giriş sözü ilə AMİ Ağcabədi filialının direktor əvəzi, filologiya elmləri namizədi, dosent Mətanət Fərzəliyeva açmışdır.

O, qeyd etmişdir ki, Azərbaycan xalq ona görə xoşbəxtdir ki, əbədiyaşar, ölməz ideyaları ilə ölkəni zirvələrə aparan Heydər Əliyev kimi böyük bir şəxsiyyəti, dahisi var. Heydər Əliyev ulu Yaradanın Azərbaycan xalqına ən böyük hədiyyəsidir.

Sonra filialın baş müəllimi Anar Kərimlinin “Heydər Əliyev Azərbaycan xalqının xilaskarıdır”, fəlsəfə doktoru Mahir Səlimovun “Heydər Əliyev və Azərbaycan ideyası”, tarix üzrə fəlsəfə doktoru Əlizadə Nəcəfovun “Heydər Əliyev və Azərbaycan mədəniyyətinin inkişafı” mövzusunda məruzələri dinlənilmişdir.

Qeyd edilmişdir ki, Azərbaycan xalqının tarixində müstəsna xidmətləri olan tarixi şəxsiyyətlər, görkəmli siyasət və dövlət xadimləri çox olmuşdur. Lakin onların içərisində ümumilli lider səviyyəsinə yalnız Heydər Əliyev yüksələ bilmişdir. Xalqımız ulu öndərin adı və əməlləri ilə daim qürur duyur. Milli liderlik və siyasi  liderlik keyfiyyətlərini özündə birləşdirən  bu dahi şəxsiyyət dünyanın ən böyük dövlət və siyasi xadimləri arasında özünə layiqli yer tutmuşdur. Ulu öndər öz xilaskarlıq missiyası ilə Azərbaycan xalqının qəlbində əbədi heykəlini ucaltmışdır.

Məruzələr ətrafında aparılan müzakirələrdə rayon icra hakimiyyəti başçısının müavin Əbülfət Tapdıqov, filialın baş müəllimləri Əli Əhmədov, Əli Əliyev, Xəyyam Bədəlov və başqaları çıxış edərək ümummilli  liderə  sonsuz xalq məhəbbətindən, onun ölməz ideya və əməllərindən danışmışlar.

Ziyəddin SULTANOV,

“Xalq qəzeti”nin bölgə müxbiri