Bakı Ali Neft Məktəbində  tələbələrin ümummilli lider Heydər Əliyevin anadan olmasının 90-cı ildönümünə həsr olunmuş “İnformasiya-kommunikasiya texnologiyalarının neft-qaz və kimya mühəndisliyində tətbiqi”mövzusunda elmi-texniki konfrans keçirilmişdir.

Konfransın plenar iclasını açan rektor Elmar Qasımov bu ali məktəbin tələbələrinin ilk konfransının ulu öndər Heydər Əliyevin anadan olmasının 90-cı ildönümünə həsr edilməsinin dahi rəhbərin şəxsiyyətinə böyük hörmət və ehtiramın təzahürü olduğunu diqqətə çatdırmışdır.

Rektor Bakı Ali Neft Məktəbində cəmi 7 ay ərzində təhsil alan tələbələrin elmi işlərə belə həvəs göstərmələrini həm onların yüksək biliklərə malik olmaları, həm də bu tədris ocağında elmi fəaliyyətin dəstəklənməsi ilə əlaqələndirmişdir.

Tədbirdə iştirak edən ARDNŞ-nin kadr, rejim və informasiya texnologiyaları üzrə vitse-prezidenti Xalik Məmmədov, AMEA-nın İnformasiya Texnologiyaları İnstitutunun direktoru, AMEA-nın müxbir üzvü, professor Rasim Əliquliyev və AMEA-nın Neft-Kimya  Prosesləri İnstitutunun direktoru, AMEA-nın müxbir üzvü, professor Vaqif Abbasov tələbələri ilk konfransın keçirilməsi münasibətilə təbrik etmiş, onların kompyuter və informasiya-kommunikasiya texnologiyalarını dərindən mənimsəmələrinin təqdirəlayiq olduğunu xatırlatmışlar.

Daha sonra 20 məruzə konfrans iştirakçılarına multimedia vasitələrilə təqdim olunmuş və böyük maraqla qarşılanmışdır.

Xatırladaq ki, münsiflər heyəti tərəfindən ən yüksək qiymətə layiq görülmüş məruzələrin müəllifləri konfransın yekun iclasında mükafatlandırılacaqlar.

Vaqif BAYRAMOV,

“Xalq qəzeti”