Bu günlərdə Azərbaycan Texniki Universitetində (AzTU) “Tələbələrin təhlükəsizliyi diqqət mərkəzində” adlı növbəti təlim kursu keçirilmişdir.

Azərbaycan Tələbə Gənclər Təşkilatları İttifaqı (ATGTİ) və Fövqəladə Hallar Nazirliyinin (FHN) Bakı Regional Mərkəzinin birgə təşkil etdiyi kurs ümummilli lider Heydər Əliyevin 90 illik yubileyinə həsr olunmuşdur.

Tədbirin məqsədi tələbələri fövqəladə hallar zamanı təcili və təxirəsalınmaz tədbirlərin görülməsi, fövqəladə halların nəticələrinin aradan qaldırılması ilə bağlı maarifləndirməkdir.

Təlimin nəzəri hissəsində “Fövqəladə hallarda özünü necə aparmalı” mövzusunda məruzələr dinlənilmişdir.

AzTU-nun prorektoru Xalıq Yahudov, ATGTİ-nin sədri Şahin İsmayılov tədbirin əhəmiyyətindən danışmışlar. Bildirilmişdir ki, tələbələr arasında bu cür təlimlərin keçirilməsi çox əhəmiyyətlidir. Tələbələrin fövqəladə hallar zamanı davranış qaydalarını bilmələri olduqca vacibdir.

Bakı Regional Mərkəzi rəisinin müavini, polkovnik Cəfər Məmmədov FHN-in gördüyü işlər, tədbirin məqsəd və məramı barədə məlumat vermişdir.

Sonra FHN-in fəaliyyəti barədə videoçarx nümayiş etdirilmiş, “Fövqəladə halların təsnifatı”, “Kollektiv mühafizə qurğuları”, “Təbii fövqəladə hallar zamanı nə etməli?”, “Yanğın - partlayış və nəqliyyat qəzası zamanı nə etməli”, “Qaz cihazlarından istifadə zamanı təhlükəsizlik qaydaları”, “Radiasiya, kimya və bioloji xarakterli fövqəladə hallar zamanı nə etməli”, “Terror xarakterli fövqəladə hallar zamanı nə etməli” və “Su hövzələrində təhlükəsizlik qaydaları” mövzularında çıxışlar olmuşdur.

Praktiki hissədə “Mersedes-Benz Sprinter” xüsusi təyinatlı xilasetmə avtomobilinin təyinatı və istifadə qaydaları, fövqəladə hallar zamanı ilkin tibbi yardım, yanğınsöndürmə texniki və vasitələrinin təyinatı, fərdi mühafizə vasitələri, radiasiya, kimyəvi kəşfiyyat və dozimetrik nəzarət cihazları, onların təyinatı və iş prinsipləri nümayiş olunmuşdur. Həmçinin, tələbələrə xüsusi riskli axtarış və qəzaxilasetmə əməliyyatlarında istifadə olunan texnika və avadanlıqların təyinatı və iş prinsipləri təqdim olunmuşdur.

Sonda tələbələr fövqəladə hallarla bağlı biliklərini əyani olaraq nümayiş etdirmişlər.

AzərTAc