Azərbaycan Turizm İnstitutunun beynəlxalq əməkdaşlıq əlaqələri gündən-günə genişlənir.

Ardıcıl olaraq bu təhsil ocağında xarici ölkələrdə fəaliyyət göstərən təhsil ocaqlarının rəhbərliyi, tələbələri ilə görüşlər keçirmək, treninqlərdə, kurslarda iştirak etmək ənənəyə çevrilib. Bu günlərdə institutda Avstriyanın İMC Krems Tətbiqi Elmlər Universitetinin prezident Heyns Boyer və beynəlxalq əlaqələr üzrə prorektoru Karl Ensfelner institutda olmuş və tələbələrlə görüşmüşlər.

Azərbaycan Turizm İnstitutnun rektoru, tarix elmləri doktoru, professor Cəfər Cəfərov qonaqları salamlayaraq iki ali təhsil müəssisəsi arasında əməkdaşlığın əhəmiyyətini vurğulamış və qısa şəkildə proqram haqqında tələbələrə məlumat vermişdir. O qeyd etmişdir ki, indiyədək ATİ-nin 57 məzunu bakalavr pilləsi üzrə Azərbaycan-Avstriya Turizm Proqramını uğurla başa vurmuşdur. Rektor bildirmişdir: “Hazırda məzunlarımız “Hilton Baku”, “Four Seasons” “Cumeirah Bilgah Beach”, “Marriotte Absheron”, “Fairmont”, “Kempinski Badamdar” kimi yeni açılmış otellər şəbəkəsində müxtəlif vəzifə sahibidirlər. Bəziləri Maldiv adaları, Birləşmiş Ərəb Əmirliyi kimi turizmi prioritet seçən ölkələrdə işləyir, bəziləri isə Şotlandiya, Türkiyə, Almaniya kimi dövlətlərdə təhsillərini davam etdirirlər”.

Cənab Heyns Boyer İMC Krems Tətbiqi Elmlər Universitetinin müxtəlif ölkələrdə beynəlxalq proqramlar həyata keçirdiyini və onların içərisində Azərbaycan – Avstriya Turizm Proqramının ən uğurlu layihə olduğunu tələbələrin diqqətinə çatdırmışdır. Aprelin 4-dən 6-na qədər Bakıda təşkil edilən növbəti 12-ci “AİTF - Azərbaycan Beynəlxalq Turizm və Səyahətlər Sərgisi”ndə iştirak edən Heyns Boyer beynəlxalq səviyyəli tədbirlərin ATİ tələbələri üçün də əhəmiyyətli olduğunu vurğulamışdır.

Beynəlxalq əlaqələr üzrə prorektor Karl Ensfelner cari tədris ilində olduğu kimi, növbəti ildə də Azərbaycan – Avstriya Proqramında oxuyan tələbələrin bir semestr müddətində Avstriyada təhsil alma imkanlarından, həmçinin praktik biliyin əldə edilməsində 22 həftəlik müddəti əhatə edən istehsalat təcrübəsinin əhəmiyyətindən danışmışdır. Bakalavr pilləsindən sonra tələbələrin təhsillərini davam etdirməyin vacibliyini diqqətə çatdıran Karl Ensfelner onları cari tədris ilindən magistratura səviyyəsində həyata keçirilən beynəlxalq proqrama dəvət etmişdir.

Qeyd edək ki, 2007-ci il iyulun 4-dən ölkə tarixində ilk dəfə olaraq Azərbaycan Turizm İnstitutu və İMC Krems Tətbiqi Elmlər Universiteti arasında bakalavr təhsil pilləsi üzrə akademik müqavilə imzalanmışdır. Akademik müqavilənin şərtlərinə əsasən, tələbələr üç tədris ili ərzində “Turizm və asudə vaxt menecmenti proqramı” üzrə ingilis dilində təhsil alırlar. Proqramı müvəffəqiyyətlə bitirən məzunlar hər iki ali təhsil müəssisəsinin diplomunu əldə edirlər. ATİ yalnız bakalavr təhsil pilləsi üzrə kadr hazırlığı ilə kifayətlənmir.

Hazırda Avstriyanın İMC Krems Tətbiqi Elmlər Universiteti ilə birlikdə magistr pilləsi səviyyəsində kadr hazırlığı həyata keçirilir. Belə ki, 2011-ci ilin oktyabr ayının 12-də Azərbaycan Respublikasının Prezidenti İlham Əliyev və Avstriya Respublikasının Federal Prezidenti cənab Haynts Fişerin iştirak etdiyi toplantıda Azərbaycan Turizm İnstitutu və Avstriyanın  İMC Krems Tətbiqi Elmlər Universiteti arasında magistratura səviyyəsində tədrisin təşkilini nəzərdə tutan əməkdaşlıq sazişi imzalanmışdır. Hazırda 20 nəfər magistr tələbə bu proqram üzrə təhsil alır.

Görüşün sonunda qonaqlar tələbələrin suallarını cavablandırmaqla onlara təhsillərində və gələcək fəaliyyətlərində uğurlar arzuladılar.

Z. BƏŞİRQIZI,

“Xalq qəzeti”