İtaliyanın aparıcı tədqiqat qurumlarından olan Beynəlxalq Münasibətlər İnstitutu (BMİ) Romada “Azərbaycanda qadınların rolu” mövzusunda seminar keçirmişdir.

Tədbiri BMİ direktorunun müavini, xanım Natali Toççi açmışdır. BMİ-nin tədqiqatçısı Nona Mikelidze, Azərbaycanın Ailə, Qadın və Uşaq Problemləri üzrə Dövlət Komitəsinin xarici əlaqələr və protokol xidməti şöbəsinin müdiri Səbinə Manafova, London Universitetinin Şərq və Afrika tədqiqatları fakültəsinin elmi işçisi Farideh Həyat və İnsan Hüquqları üzrə İtaliya Helsinki Komitəsinin baş katibi Antonio Stanqo seminarda çıxış etmişlər.

Azərbaycanın İtaliyadakı səfirliyindən AzərTAc-a bildirmişlər ki, tədbirdə qadınların Azərbaycan tarixində rolu, ölkəmizin müstəqillik əldə etdiyi illərdə qadınların hüquqlarının qorunması sahəsində aparılmış islahatlar, Ermənistan-Azərbaycan, Dağlıq Qarabağ münaqişəsi nəticəsində məcburi köçkün və qaçqın düşmüş qadınların hüquqlarının bərpası və qorunması, ailə və qadın məsələləri sahəsində əldə olunmuş nailiyyətlər, mövcud problemlər barədə məlumat verilmiş, bu problemlərin aradan qaldırılması imkanları ilə bağlı fikir mübadiləsi aparılmışdır.

Tədbirdə auditoriyanın çoxsaylı sualları cavablandırılmış və mövzu ilə əlaqədar geniş müzakirələr aparılmışdır. Seminarda İtaliyanın akademik, dövlət və işgüzar dairələrinin, mətbuat orqanlarının və Romadakı diplomatik korpusun nümayəndələri iştirak etmişlər.

AzərTAc