Dünən Azərbaycan Dövlət Neft Akademiyasında Amerika Birləşmiş Ştatlarının ölkəmizdəki fövqəladə və səlahiyyətli səfiri Riçard Morninqstarla görüş keçirilib. Tədbirdə çıxış edən ADNA-nın rektoru, akademik Siyavuş Qarayev qonağa Neft Akademiyasının tarixi, strukturu və nailiyyətləri barədə məlumat verərək bildirib ki, rəhbərlik etdiyi ali təhsil ocağı ABŞ-ın Atlanta şəhərindəki Corciya Dövlət Universiteti ilə sıx əməkdaşlıq əsasında “Biznesin idarə olunması” ixtisası üzrə bakalavr və magistr səviyyələrində birgə mütəxəssis hazırlığını həyata keçirir.

Səfir təhsil ocağımızda aparılan elmi-tədqiqat işlərinə, xarici ölkələr üçün mütəxəssis hazırlığına, neft şirkətləri ilə mövcud əlaqələrə, ABŞ və Azərbaycanın ali məktəbləri arasında tələbə və müəllim mübadiləsinə böyük maraq göstərib. Riçard Morninqstar hazırda Amerika universitetlərində müxtəlif proqramlar əsasında 200-dən artıq azərbaycanlı tələbənin təhsil aldığını qeyd edərək, bu sahədə əməkdaşlığın daha da genişləndirilməsinin vacibliyini vurğulayıb.

Tələbələrlə görüşən ABŞ səfiri bildirib ki, belə görüşlərə böyük əhəmiyyət verir. ADNA-da müxtəlif ixtisaslar üzrə təhsil alan tələbələrin çoxsaylı suallarına cavab verən səfir gənclərin ingilis dilində sərbəst danışmasına, dünya görüşlərinin genişliyinə  heyran olduğunu, ADNA ilə daha sıx əlaqə saxlayacağını bildirib.

Paşa ƏMİRCANOV,

“Xalq qəzeti”