Aprelin 5-də Azərbaycan Texniki Universitetində (AzTU)  nəqliyyat, avtomatika və kompyuter texnikası,  mühəndis biznesi və menecment fakültələrində təhsil alan tələbələrin Nəqliyyat Nazirliyinin nümayəndələri ilə  görüşü olmuşdur. 

AzTU-nun mətbuat xidmətindən AzərTAc-a bildirmişlər ki, görüşdə universitetin prorektoru, dosent  Xalıq Yahudov bu ali təhsil ocağında ölkəmizin nəqliyyat sektoru üçün yüksək ixtisaslı kadrların hazırlanmasından, AzTU-nun nəqliyyat fakültəsində təhsil alan gənclərin Nəqliyyat Nazirliyinin tabeliyində olan qurumlarda təcrübə keçmələrinin əhəmiyyətindən danışmışdır.

Tədbirdə AzTU ilə Nəqliyyat Nazirliyi arasında əməkdaşlığın möhkəmləndirilməsinin vacibliyi  xüsusi vurğulanmışdır.

Nəqliyyat Nazirliyinin sektor müdiri Eldar Əlizadə ölkəmizdə nəqliyyat sahəsində həyata keçirilən vahid dövlət siyasətinin əsas istiqamətləri, nəqliyyatın inkişafı sahəsində  əldə edilən nailiyyət və perspektivlərdən söz açmışdır. Qeyd etmişdir ki, 12 dövləti əhatə edən TRASEKA layihəsi, Avropanın şimalını Çin ilə birləşdirən böyük nəqliyyat magistralı ölkəmizin iqtisadiyyatının inkişafına külli miqdarda gəlir gətirəcəkdir. Son bir neçə ildə həmin magistralla 440 milyon ton yük, 180 milyon sərnişin daşınmışdır.

Görüşdə Bakı Beynəlxalq Dəniz Ticarəti Limanının tikintisi barədə məlumat verilmişdir. Bildirilmişdir ki, gələcəkdə həmin liman vasitəsilə illik yük daşınması həcmi 25 milyon tona çatdırılacaqdır.

Tədbirdə respublikamızda yol infrastrukturunun inkişafı və perspektivləri, nəqliyyatın intellektual idarəedilməsi ilə bağlı görülmüş işlərdən də  geniş  bəhs edilmişdir. Nəqliyyat Nazirliyinin tabeliyində olan qurumlarda universitetin nəqliyyat fakültəsini bitirən gənc mütəxəssislərə ehtiyac olduğu vurğulanmışdır.  

Sonda tələbələri maraqlandıran suallar cavablandırılmışdır.