Azərbaycanlı alim, fizika-riyaziyyat elmləri doktoru, AMEA-nın Kibernetika İnstitutunun əməkdaşı, İstanbul Universitetinin professoru Elimxan Mahmudovun “Single Variable Differential and Integral Calculus” (“Təkdəyişənli diferensial və inteqral hesabı”) adlı 388 səhifəlik kitabı dünya riyaziyyatçılarının böyük dəstəyi ilə Parisdə  “Springer” nəşriyyatında çapdan çıxmışdır.

 AzərTAc xəbər verir ki, müasir dünya universitetləri, riyaziyyatçı alimlər üçün nəzərdə tutulmuş bu kitabda həqiqi və kompleks saylar və nəzəriyyəsi, vektor fəzalar, çoxluqlar və onların bəzi topoloji xassələri diferensial və inteqral hesabı və onların tətbiqi, funksional ardıcıllıqlar və onların kompleks dəyərli funksiyalar halına genişlənməsi məsələləri  əksini tapmışdır.

Bütün bunlarla bərabər, kitabda atom enerjisi və böhran kütlədən, atom reaktorlarının işləmə prinsiplərindən bəhs edilmiş, o cümlədən Çernobıl Atom Elektrik Stansiyasında  baş verən qəzanın  başlıca səbəbləri bir daha izah edilmişdir.

 Bu nəşr həmyerlimizin xarici ölkələrdə çap olunmuş üçüncü kitabıdır. Onun  ABŞ-da “Elsevier”  nəşriyyatı tərəfindən  çap olunmuş,  optimal idarəetmə sahəsində, dərin riyazi elmə əsaslanan  “Approximation and Optimization of Discrete and Differential Inclusions” (Appoksimasiya, diskret və diferensial daxiletmələrin optimizasiyası")  396 səhifəlik kitabı da dünya  riyaziyyat aləmində müstəsna kitablardan biridir. Təkcə onu demək kifayətdir ki, bu kitab ABŞ-ın  67 ən qabaqcıl  universitetində tədris olunmaqda, öyrənilməkdədir. Müəllif bu kitabı Xocalı soyqırımı qurbanlarına həsr etmişdir.