Azərbaycan Dövlət Neft Şirkətinin Sumqayıt Təlim-Tədris Mərkənzində (STTM) gənc mütəxəssis-fəhlələrin ilk buraxılış imtahanı olmuşdur.

“Azərıkimya» İstehsalat Birliyinin, ARDNŞ-in Təlim-Tədris və Sertifikatlaşdırma İdarəsi rəhbərlıyınin iştirakı ilə keçirilən imtahanda tornaçı ixtisası üzrə texniki peşə təhsili almış 12 gənc imtahan komissiyası qarşısında nəzəri bilik və praktiki bacarığını nümayiş etdirmişdir.  İmtahandan əvvəl ARDNŞ-in Təlim-Tədris və Sertifikatlaşdırma İdarəsinin Sumqayıt Təlim-Tədris Mərkəzinin pedaqoqları müasir təlim-tədris ocaqlarının yaradılmasına, gənclərin yüksək səviyyədə ixtisaslara yiyələnməsinə xüsusi diqqət yetirən ölkə Prezidentinə dərin minnətdarlıq ifadə etmişlər. İkimərtəbəli tədris korpusuna, ixtısaslaşmış auditoriyalara malik, müasir tədris vasitələri və texniki avandanlıqlarla təchiz edilnmiş STTM-də ötən ilin sentyabrından 100 nəfər gənc müxtəlif fəhlə peşələri üzrə texniki təhsil almaq imkanı əldə etmişdir.

Asif Şəfəqqətovun sədrlik etdiyi imtahan komissiyası, o cümlədən “Azərikimya” İB-nin baş mütəxəssisləri qarşısında peşə imtahanı verən müdavim tornaçılar yanvar-fevral aylarında Etilen-polietilen və Mexaniki-təmir zavodlarının, Təmir-tikinti İdarəsinin mexaniki sexlərində peşəkarların və təlim ustalarının nəzarəti altında istehsalat təcrübəsində olmuş, müxtəlif təyinatlı torna dəzgahlarında peşə vərdişlərinə yiyələnmişlər. Bunu imtahanın nəticələri də təsdiq etmişdir - STTM -in ilk məzunları müvafiq nəzəri bilik və praktik bacarıq nümayiş etdirərək tornaçı kimi istehsalata vəsiqə almışlar.

“Azərikimya” İB Müşahidə Şurasının sədri, Milli Məclisin deputatı  Muxtar Babayev və ARDNŞ-in Təlim-Tədris və Sertifikatlaşdırma İdarəsinin rəisi Fuad Süleymanov  STTM-in rəhbərliyini və gəncləri ilk uğurları münasibətilə təbrik etmiş, onlara gələcək əmək fəaliyyətlərində uğurlar arzulamışlar.

Əli NƏCƏFXANLI,
“Xalq qəzeti”