Ötən əsrin 30-cu illərində inşa edilmiş Telman kənd məktəbində normal təhsil üçün şərait yox idi. Məktəbin pedaqoji kollektivinin, şagird və valideynlərin çoxdankı arzusu nəhayət həyata keçdi. Müasir tələblərə cavab verən, şagirdlərin yüksək təhsili üçün hər cür şərait yaradılan ikimərtəbəli yeni bina tikilərək istifadəyə verildi.

Təntənəli açılış mərasimini rayon təhsil şöbəsinin müdiri Qızbəs Məmmədova açaraq təhsilin maddi-texniki bazasının möhkəmləndirilməsindən, Astarada təhsil sahəsinin uğurlarından danışdı. Məktəblilər şeirlər söylədilər. Məktəbin direktoru Sərraf Əhmədov, ağsaqqal Qasım Həsənov, müəllim Aydın Məmmədov kənddə təhsilin inkişafı üçün yaradılmış yüksək şəraitdən razılıqlarını bildirdilər.

Rayon icra hakimiyyətinin başçısı Qəzənfər Ağayev kənd sakinlərini salamlayaraq  yeni məktəbin açılışı münasibətilə onları təbrik etdi. Ulu öndərin siyasətini uğurla davam etdirən Prezident İlham Əliyev tərəfindən ölkəmizdə təhsilin inkişafı üçün bütün imkanların yaradıldığını, təhsilin maddi-texniki bazasının daha da möhkəmləndirilməsi istiqamətində işlərin sürətlə davam etdiyini diqqətə çatdırdı. Dedi ki, bu, son illərdə  rayonda istifadəyə verilən 24-cü yeni məktəbdir. Hazırda rayonda daha 10 məktəbin tikintisi davam etdirilir. Bütün bunlar daha keyfiyyətli təhsil üçün əlverişli zəmin yaradır.

Rəmzi açılış lenti kəsildikdən sonra mərasim iştirakçıları yeni məktəb binası ilə tanış oldular. Rayon icra hakimiyyəti tərəfindən şagirdlərə geyim formaları təqdim edildi. Mərasim iştirakçıları məktəbin kompyuter otağı, sinifləri, fənn kabinetləri, idman zalı və kitabxanasına baxdılar.

Əli NƏCƏFXANLI,

“Xalq qəzeti”