Bolqarıstanın Azərbaycandakı səfiri  xanım Maya Hristova Bakı Ali Neft Məktəbində (BANM) olmuşdur. BANM-nin rektoru Elmar Qasımov bu məktəbin tarixi və fəaliyyəti haqqında qonağa ətraflı məlumat verərək bildirmişdir ki, sözügedən təhsil ocağının yaranmasında əsas məqsəd Azərbaycan və ARDNŞ üçün beynəlxalq standartlara cavab verən, ingilisdilli kadrların hazırlanmasıdır.

BANM-ə ən yüksək göstəricilərə malik tələbələrin qəbul olunduğunu deyən rektor, hazırda yüksək səviyyədə təchiz olunmuş binada fəaliyyət göstərən adıçəkilən ali məktəb üçün yaxın gələcəkdə ən müasir tələblərə cavab verən kampusun salınacağını vurğulamışdır. O, təhsil müəssisəsinin beynəlxalq əlaqələrinin genişləndirilməsinin vacibliyini diqqətə çatdırmışdır. Xatırlatmışdır ki, Avropa təhsil sisteminin tələblərinə uyğun yaradılmış BANM-in önəm verdiyi əsas məsələlərdən biri də Avropanın  aparıcı təhsil mərkəzləri ilə əlaqələrin qurulmasıdır.

 E.Qasımov  həmçinin qeyd etmişdir ki, ən müasir standartlara uyğun tədris prosesinin qurulduğu ali məktəblə Böyük Britaniyanın Heriot-Vatt Universiteti arasında sıx tərəfdaşlıq münasibətləri qurulmuşdur. Bunun nəticəsi olaraq BANM məzunlarına iki diplomun verilməsi nəzərdə tutulmuşdur.

Bolqarıstanın  Azərbaycandakı  səfiri  Maya Hristova BANM-ə gəlişindən məmnunluq  hissi  keçirdiyini  vurğulamışdır. O, Azərbaycan xalqının milli bayramı olan Novruz münasibətilə təbriklərini və xoş arzularını rektora çatdırmışdır. Səfir eyni zamanda  qısa vaxt ərzində BANM-də yaradılan şəraitdən və əldə olunan yüksək nəticələrdən razı qalaraq, ali məktəblə müxtəlif təhsil layihələri çərçivəsində əməkdaşlıq qurmaq niyyətini ifadə etmişdir.

“Xalq qəzeti”