Martın 14-də Azərbaycan Müəllimlər İnstitutunda (AMİ) Nərimanov Rayon Gənclər və İdman İdarəsi   institutun tələbə-gənclər təşkilatı ilə birgə “Gəldi ömrümüzə bahar günləri” mövzusunda bədii-əyləncəli tədbir keçirmişdir.

AzərTAc xəbər verir ki, tədbirdə AMİ-nin rektoru, Milli Məclisin deputatı, professor Aqiyə Naxçıvanlı və Nərimanov Rayon Gənclər və İdman İdarəsinin rəisi Nəcəf Novruzov xalqımızın əziz bayramı münasibətilə iştirakçıları təbrik etmişlər. Bildirilmişdir ki, Novruz milli bayramımız olaraq əsrlərdən bəri yurdumuzun hər yerində mərasimlərlə qeyd olunur. Təbiətin oyanması Novruzdan başlanır və xalqımız bu gözəl bayramı təntənəli şəkildə qarşılayır. Bu bayram insanlar arasında birlik və mehribanlığın möhkəmləndirilməsi, onların bir-birinə diqqət göstərməsi kimi sağlam dəyərlər üzərində qurulmuşdur. Ölkəmiz sürətlə inkişaf edir, müasirləşir. Eyni zamanda, qədim ənənələrimiz də geniş təbliğ edilir, nəsildən-nəslə ötürülür. 

Ümummilli lider Heydər Əliyev hər zaman Novruz bayramını xalqla birlikdə qeyd etmişdir. Hazırda ulu öndərin irsi Prezident İlham Əliyev tərəfindən layiqincə davam etdirilir. Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın səyi nəticəsində Novruz bayramı 2009-cu ildə UNESCO-nun qeyri-maddi mədəni irs siyahısına daxil edilmişdir. 2010-cu ildə isə BMT Baş Məclisinin 64-cü sessiyasının iclasında mart ayının 21-i “Beynəlxalq Novruz Günü” elan edilmişdir.

Tədbirdə, həmçinin AMİ-nin ölkəmizin müxtəlif regionlarında fəaliyyət göstərən filiallarının fəal tələbə gənclərinin bayram təbriklərindən ibarət videoyazılar nümayiş olunmuşdur.

Bayram şənliyində təhsildə və ictimai fəaliyyətində fərqlənən institutun bir qrup tələbəsi mükafatlandırılmışlar. Eyni zamanda, xonça müsabiqəsinin qalibləri və peyntbol üzrə ali təhsil müəssisələrinin tələbələri arasında II respublika yarışında 2-ci yer tutmuş institut komandasının 5 üzvünə hədiyyələr verilmişdir.

Sonra AMİ tələbələrinin hazırladıqları səhnəciklər, konsert proqramı və digər əyləncəli tədbirlər iştirakçılarda xoş ovqat  yaratmışdır.