Masallı rayon Gənclər Mərkəzində  gənc alimlərin II Respublika elm festivalı çərçivəsində “Müasir şəraitdə Azərbaycan tarixi, dili, ədəbiyyatı və fəlsəfəsi qarşısında duran yeni vəzifələr” adlı festival öz işini başa çatdırmışdır .

Festival Azərbaycan Gənc Alim, Aspirant və Magistrlər Cəmiyyəti, AMEA-nın Gənclərin İntellektual İnkişaf Mərkəzi, habelə Azərbaycan Respublikası Gənclər və İdman Nazirliyinin dəstəyi ilə keçirilmişdir. Festivala tədqiqat aparan, eləcə də ali təhsil müəssisələrində çalışan gənc alimlər qatılmışlar.

Gənc Alim, Aspirant və Magistrlər Cəmiyyətinin sədri İlqar Orucov festivalı giriş sözu ilə açaraq  bu kimi tədbirlərin regionlarda keçirilməsinin vacibliyini vurğlamışdır. O qeyd etmişdir ki, ölkə rəhbərliyi Azərbaycan elminə misilsiz diqqət və qayğı göstərir. Bunun bariz nümunəsi alimlərimizin elmi tədqiqatlarının respublikamızın hüdudlarından kənarda da tanınmasına nail olunmasıdır. Azərbaycan alimlərinin elmi tədqiqatları dünyanın bir çox ölkəsinin elmi mərkəzlərində, beynəlxalq simpozium və konfranslarda maraqla qarşılanır.

Masallı Rayon İcra Hakimiyyəti başçısının müavini Nəsir Muxtarlı, gənclər və idman idarəsinin rəisi Camal Manafov çıxışlarında bildirmişlər ki, ölkəmizdə gənclərə və gənc  alimlərə dövlət qayğısı gündən-günə artmaqdadır. Dövlət gənclər siyasəti ölkədə, o cümlədən Masallıda uğurla icra edilir.

Festivalda gənc alimlərin Azərbaycan tarixi, ədəbiyyatı, incəsənəti, mədəniyyəti və folkloru ilə bağlı elmi əsərləri iştirakçılara təqdim olunmuşdur.

Elm bayramında 50 gənc alim və Masallı rayonundan 100-dən artıq fəal gənc təmsil olunmuş, həmçinin festival 2 gün davam etmişdir.

Əli NƏCƏFXANLI,
"Xalq qəzeti"