Masallı şəhərindəki Gənclər Mərkəzində Azərbaycan Tibb Universitetinin “Tibbi biologiya və genetika” kafedrasının dosenti, biologiya üzrə fəlsəfə doktoru Rahib Əliyevin anadan olmasının 75 illik yubileyi qeyd edilmişdir.

Tədbiri rayon İcra hakimiyyətinin başçısı Rafil Hüseynov açaraq yubliyarı təbrik etmiş və onun haqqında xoş sözlərini söyləmişdir. O demişdir ki, gözəl insan və görkəmli pedaqoq kimi tanınan Rahib Əliyev Masallının Mahmudavar kəndində dünyaya göz açmışdır. O, 45 il çalışdığı Azərbaycan Tibb Universitetində alim və müəllim kimi elmi-pedaqoji fəaliyyətində uğurlar əldə etmiş, çoxsaylı elmi əsərlər - dərsliklər, məlumat kitabları, lüğətlər,  tədris vəsaitləri və proqramları hazırlamış, bütün bilik və bacarığını gənc nəslin təlim-tərbiyəsinə, peşəkar və yüksək hazırlıqlı tibb kadrlarının hazırlanmasına həsr etmişdir. Rahib Əliyev pedaqoji fəaliyyəti dövründə 60 mindən çox tələbəyə dərs demiş, onların layiqli vətəndaş kimi yetişməsində bilik və bacarığını əsirgəməmişdir.

Sonra Azərbaycan Tibb Universitetinin kafedra müdiri, professor Canbaxış Nəcəfov, Prezident təqaüdçüsü Şirvan Əbilov, səhiyyə şöbəsinin müdiri Cəlil Nəzərov, xalq artisti Canəli Əkbərov, professorlar İbadulla Ağayev, Eyyub Əzizov, Fəxrəddin Məmmədov və başqaları yubliyara xoş arzularını çatdırmışlar.

Tədbirin sonunda Masallı şəhər Mədəniyyət evi özfəaliyyət kollektivi maraqlı konsert proqramı təqdim etmişdir.

Əli NƏCƏFXANLI,
"Xalq qəzeti"