Azərbaycan Dövlət Akademik Milli Dram Teatrında  “Azərbaycan tarixi fənn aylığı”nın yekun konfransına həsr olunmuş “Tariximiz - dünənimiz, bu günümüz və gələcəyimizdir”  adlı tədbir keçirilmişdir.

Bakı Şəhəri üzrə Təhsil İdarəsi (BŞTİ) tərəfindən ümumtəhsil məktəblərində təhsilin keyfiyyətinin yüksəldilməsi, fənn müəllimlərinin, şagirdlərin, dərnək rəhbərlərinin tədris prosesində və sinifdənxaric tədbirlərdə yaradıcı fəaliyyətinin səviyyəsinin öyrənilməsi və təbliği, eləcə də hər bir fənn üzrə sinifdənxaric tədbirlərin təşkili məqsədilə 26 noyabr 2012-ci il tarixindən 25 dekabr 2012-ci il tarixinədək  BŞTİ-nin tabeliyində olan ümümtəhsil məktəblərində “Azərbaycan tarixi fənn aylığı” elan edilmişdir.

“Azərbaycan tarixi fənn aylığı”  BŞTİ-nin tabeliyində olan ümumtəhsil məktəblərinin  müəllimləri ilə yanaşı, VII - XI sinif şagirdlərini də əhatə etmiş və üç mərhələdə keçirilmişdir.

Qeyd edək ki, aylıq 4 nominasiyadan ibarət olmuşdur: 

- Fəal təlim əsasında qurulmuş ən yaxşı dərs layihəsi və ya metodik tövsiyyə;

- Ən yaxşı metodik iş sistemi olan məktəb;

- Ən yaxşı açıq dərs;

- Şagirdlərin Azərbaycan tarixi fənnindən ay ərzində keçilən mövzulara aid ən yaxşı və yaradıcı işləri (referat, məqalə və s.) üzrə təşkil olunub.

Hər nominasiya üzrə qaliblərə birinci, ikinci və üçüncü dərəcəli diplomlar verildi. Ayrı-ayrı nominasiyalar üzrə fəallığı ilə seçilən iştirakçılar isə həvəsləndirici diplomla mükafatlandırıldılar. Tədbirin birinci hissəsində rəsmi qonaqlar çıxış etdilər. Həmçinin, müsabiqədə qalib olmuş müəllim və şagirdləri təbrik etdilər. İkinci hissədə isə istedadlı məktəblilərinin hazırladıqları ədəbi-bədii kompozisiya nümayiş etdirildi.

Tədbirdə Bakı Şəhəri üzrə Təhsil İdarəsinin müdiri Nailə Rzaquliyeva, idarənin ictimaiyyətlə əlaqələr şöbəsinin müdiri Zəminə Əliqızı, millət vəkili Ziyad Səmədzadə və digər tanınmış pedaqoqlar çıxış etdilər.

Elçin ABBASOV,
“Xalq qəzeti”