Azərbaycan Prezidenti yanında Ali Attestasiya Komissiyası (AAK) fəaliyyətə başladığı 1993-cü ildən indiyə qədər 1328 iddiaçıya elmlər doktoru elmi dərəcəsi, 7764 iddiaçıya isə fəlsəfə doktoru elmi dərəcəsi verilmişdir.

APA-nın xəbərinə görə, AAK-ın sədr müavini Vəli Hüseynov bildirmişdir ki, professor elmi adı 1136, dosent elmi adı 4182 iddiaçıya verilmişdir.

Onun sözlərinə görə, 2012-ci ildə elmlər doktoru elmi dərəcəsi 90 nəfərə verilmişdir ki, onların da 82-si birbaşa attestasiyadan, qalan 8 nəfəri isə təkrar attestasiyadan, yəni başqa dövlətdə müdafiə edərək Azərbaycanda təkrar attestasiyadan keçmişlər: Fəlsəfə doktoru elmi dərəcəsini almaq üçün 570 nəfər elmi işini ölkədə müdafiə etmişdir. 39 nəfər isə işini xaricdə müdafiə edərək Azərbaycanda təkrar attestasiyadan keçmişdir. Ümumilikdə 609 nəfər fəlsəfə doktoru elmi dərəcəsi almışdır. 2012-ci ildə isə 96 nəfər professor, 273 nəfər isə dosent attestatı almışdır.

AAK-ın sədr müavini bəzi işlərdən imtina edildiyini də qeyd etmişdir. O bildirmişdir ki, plagiat faktları aşkarlandığına, elmi yenilik olmadığına və işlər AAK-ın tələblərinə cavab vermədiyinə görə bir sıra işlərdən imtina edilmişdir. Onun sözlərinə görə, ötən il 15 elmlər doktoru dissertasiyasından, 162 fəlsəfə doktoru dissertasiyasından, 3 professor attestasiya işindən, 28 dosent attestasiya işindən imtina olunmuşdur.