Tələbə Qəbulu üzrə Dövlət Komissiyasının sədri Məleykə Abbaszadə 2013/2014-cü tədris ili üçün respublikanın ali təhsil müəssisələrinə və tam orta təhsil bazasında orta ixtisas təhsili müəssisələrinə qəbul qaydalarına həsr olunmuş mətbuat konfransı keçirmişdir. Tədbirdə eyni zamanda “Abituriyent” jurnalının 1-ci sayının təqdimatı olmuşdur.

TQDK sədri “Abituriyent” jurnalının 1-ci sayında əksini tapan materiallarla bağlı KİV nümayəndələrinə geniş məlumat verərək bildirmişdir ki,  jurnalda tələbə qəbulu qaydaları ilə yanaşı, qəbul proqramları,  ali təhsil müəssisələrinə qəbul imtahanı fənləri üzrə test tapşırığı və  açıq tipli test nümunələri, xüsusi təyinatlı təhsil müəssisələrinə qəbul elanları və digər zəruri məlumatlar dərc edilmişdir.

Mətbuat konfransında 2013/2014-cü tədris ili üçün ali təhsil müəssisələrinin bakalavr və magistr səviyyələrinə, həmçinin,  orta ixtisas təhsil müəssisələrinə qəbul imtahanlarının, eləcə də sınaq imtahanlarının vaxtları media nümayəndələrinin diqqətinə çatdırılmışdır. 

 TQDK sədri Məleykə Abbaszadə demişdir ki, ilk imtahanın III ixtisas qrupu üzrə keçirilməsi nəzərdə tutulur. Bu qrup üzrə imtahan iyulun 14-də, I ixtisas qrupu üzrə iyulun 21-də, IV ixtisas qrupu üzrə iyulun 28-də, II ixtisas qrupu üzrə avqustun 3-də keçiriləcək. Lakin bu tarixlər layihə olaraq müəyyənləşdirilmiş və imtahanın təşkilində iştirak edən müvafiq orqanlarla birgə dəqiqləşdirilmişdir:“Layihədə hansısa dəyişiklik ola bilər. Bu dəyişiklik hava şəraiti və digər şəraitlərlə əlaqədar ola bilər. Ötən il qəbul imtahanlarını elan etmişdik, ancaq buraxılış imtahanları TQDK tərəfindən keçirildiyi üçün qəbul imtahanlarının vaxtı dəyişdirildi”.

Məleykə Abbaszadə bildirmişdir ki, ali təhsil müəssisələrinin bakalavriat səviyyəsi üzrə sınaq imtahanları aprelin 7-dən mayın 26-dək keçiriləcək. Bu müddətdə ümumilikdə 7 sınaq imtahanı keçiriləcək, onların 3-ü təkrar olacaq.

Ali təhsil müəssisələrinə ərizə qəbulu aprelin 9-dan başlayacaq və mayın 15-dək davam edəcək. Bakalavrlar ərizələrini aprelin 15-dən mayın 17-dək təsdiq etdirə bilərlər. Ali və orta ixtisas təhsili müəssisələrinə (tam orta təhsil bazasında) qabiliyyət imtahanı iştirakçılarının qeydiyyatı mayın 1-dən 20-dək aparılacaq. Rus bölməsi üzrə Azərbaycan dili imtahanının I mərhələsi mayın 19-da Bakıda və bölgə mərkəzlərində keçiriləcək. Mayın 8-i rus bölməsi üzrə Azəbaycan dili imtahanının I mərhələsində iştirak etmək istəyən abituriyentlər üçün ərizə təsdiqinin son günü olacaq.

Rus bölməsi üzrə Azərbaycan dili imtahanının II mərhələsi iyunun 23-də olacaq və yalnız Bakıda keçiriləcək.

Hərbi liseylərə ərizə qəbulu 15 aprel-25 iyun tarixlərində aparılacaq. Magistraturaya sınaq imtahanı 17 fevral, magistraturanın I mərhələsi üzrə qəbul imtahanı 3 mart, II mərhələsi üzrə qəbul imtahanı 23 iyunda olacaq. Magistraturaya proqram seçimi 3-11 iyun, magistraturaya ixtisaslaşma seçimi 26-28 iyun tarixlərində, ali məktəblərin müxtəlif istiqamətləri üzrə qabiliyyət imtahanları isə iyulun 18-dən avqustun 12-dək olacaq. Ali təhsil müəssisələrinə ixtisas seçimi 6-15 avqustda, bakalavriat səviyyəsi üzrə ali təhsil müəssisələrinə əlavə yerləşdirmə və orta ixtisas təhsili müəssisələrinə (tam orta təhsil bazasında) müsabiqə və yerləşdirilmə 18-22 avqustda keçiriləcək.

Rezidenturaya sınaq imtahanı 17-18 avqustda, sənəd qəbulu 14-23 avqustda, qəbul imtahanı 9-10 sentyabrda keçiriləcək.

Komissiya sədri KİV nümayəndələrini maraqlandıran müxtəlif sualları cavablandırmışdır.

Samirə ƏLİYEVA
“Xalq qəzeti”