Fevralın 14-də Tələbə Qəbulu üzrə Dövlət Komissiyasının (TQDK) sədri Məleykə Abbaszadə Bakı Ali Neft Məktəbində (BANM) professor-müəllim və tələbə heyəti ilə görüşmüşdür. AzərTAc xəbər verir ki, görüşdə çıxış edən BANM rektoru Elmar Qasımov ölkəmizdə təhsil sahəsində aparılan islahatlardan söhbət açaraq qeyd etmişdir ki, Prezident İlham Əliyevin rəhbərliyi ilə Azərbaycanda təhsil sahəsi uğurla inkişaf etdirilir. Bildirmişdir ki, ölkə başçısının “Neft kapitalını insan kapitalına çevirək” şüarı təhsilə dövlət qayğısının əsas göstəricisidir.

Rektor vurğulamışdır ki, Azərbaycan Respublikası Dövlət Neft Şirkəti (ARDNŞ) investisiya layihələri ilə yanaşı, bir çox sosial və təhsil layihələrini də həyata keçirir. BANM-ın yaradılmasının da əsas məqsədi ARDNŞ üçün beynəlxalq standartlara cavab verən, müasir texnika və texnologiyalara yiyələnmiş, yüksəkixtisaslı və ingilisdilli ixtisaslı kadrların hazırlanması olmuşdur. Qeyd edilmişdir ki, bu gün məktəbdə 120 tələbə təhsil alır və onların hamısı 600-dən yuxarı bal toplayan tələbələrdir.

Sonra çıxış edən TQDK sədri Məleykə Abbaszadə “Abituriyent” jurnalının 2012/2013-cü tədris ili üçün ali məktəblərə qəbul üzrə reytinq cədvəlində BANM 14 min 247 xalla birinci yer tutması münasibətilə məktəbin kollektivini və tələbələri təbrik etmişdir.

TQDK sədri qeyd etmişdir ki, BANM-ın yeni yaranmasına baxmayaraq, belə yüksək nailiyyət qazanması məktəbdə müasir standartlara uyğun təhsilin təşkilindən xəbər verir. Məktəbdə təhsil alan hər bir tələbə dövlətimiz tərəfindən onlar üçün yaradılan münbit şəraitdən yararlanmalı və bu gün dinamik inkişaf edən ölkəmizin sosial-iqtisadi həyatında yaxından iştirak etməlidir.

Sonra qonaq tələbələrin suallarını cavablandırmışdır.

AzərTAc