Gəncə ziyalıları Əkrəm Əylislinin “Daş yuxular” romanına münasibətlərini bildirmiş, bu əsəri qınamışlar. Meydana toplaşan onlarla ziyalı bu üzdəniraq “Azərbaycan yazıçı”sının yalan və iftira ilə dolu “Daş yuxular” yazısına etiraz əlaməti olaraq onun kitablarının nüsxələrini yandırmışlar.

Gəncə Dövlət Universitetinin professoru Həsənbala Sadıqov AzərTAc-a demişdir ki, öz xalqına böhtan atan, onu dünyada ən zalım və riyakar millət kimi təqdim edən Əkrəm Əylisli bu əsərlə Azərbaycan tarixini ləkələməyə çalışmış, bədnam qonşularımızın dəyirmanına su tökmüşdür. Bu gün yandırılan kitablar gəncəlilərin Ə.Əylisliyə olan sonsuz qəzəbinin ifadəsidir.