Lənkəran Şəhər İcra Hakimiyyətinin başçısı Taleh Qaraşov  Kanadanın Toronto Universitetinin professoru Robert Austinin başçılıq etdiyi nümayəndə heyətini qəbul etmişdir.

İcra Hakimiyyətinin konfrans zalında qonaqları salamlayan icra başçısı dünya elminə böyük töhfələr verən Toronto Universitetiylə Lənkəran Dövlət Universitetinin əməkdaşlığının   LDU-nun gələcək fəaliyyətində mühüm rol oynayacağını bildirib.

T.Qaraşov daha sonra qonaqlara Lənkəran şəhərinin  qədim tarixi, mədəniyyəti, iqtisadiyyatı haqqında geniş məlumat verib, Lənkəranın  mətbəxi, böyük ziyalı və turizm potensialına malik olması barədə  danışıb, ölkəmizdə həyata keçirilən genişmiqyaslı proqram və layihələrdən, təhsil sahəsində həyata keçirilən islahatlardan söz açıb, Azərbaycanda turizmin inkişafı ilə bağlı hazırlanan proqramlardan, son 1 il ərzində Lənkəran rayonuna 10 minə yaxın xarici turistin gəlməsindən ətraflı bəhs edib.

Dövlətimizin azərbaycanlı gənclərin bir sıra inkişaf etmiş xarici dövlətlərin universitetlərində təhsil almaları üçün xüsusi proqramların yerinə yetirdiyini diqqətə çatdıran icra başçısı Toronto Universitetində  hazırda 70 nəfər azərbaycanlı gəncin təhsil aldığını qeyd edib, onların gələcəkdə hərtərəfli biliyə malik olan mütəxəssislər kimi yetişəcəyinə əmin olduğunu  vurğulayıb.

Toronto Universitetinin professoru Robert Austin öz növbəsində səmimi qəbula və qonaqpərvərliyə görə  minnətdarlığını bildirib.Belə gözəl diyarda olmaqdan, dünya şöhrətli Lənkəran çayını içməkdən məmnun olduğunu söyləyən professor səfərin əsas məqsədinin  Toronto Universitetində təhsil alan tələbələrin Azərbaycanı yaxından tanımalarına xidmət etdiyini diqqətə çatdırıb.

Görüşdə iştirak əslən Lənkəranlı, Kanada-Azərbaycan Araşdırmalar İnstitutunun təsisçisi, Kanadanın Vaterloo Universitetinin professoru İlham Axundov qeyd edib ki, nümayəndə heyətinə daxil olan tələbələr arasında Azərbaycan təəssüratları haqqında iyirmi səhifəlik tezislər hazırlamaq nəzərdə tutulmuşdur.

Sonra nümayəndə heyətinə daxil olan bir qrup tələbə Lənkəran Dövlət Universiteti ilə tələbə mübadiləsinin aparılması, geosiyasət, Azərbaycanın mədəniyyəti, beynəlxalq turizm əlaqələri, Azərbaycanda xarici investisiya qoyuluşu, qeyri-neft sektorunun inkişafı, Azərbaycanın Avropa ölkələri ilə əlaqələri barədə suallarla müraciət ediblər. Tələbələri maraqlandıran suallara ətraflı cavab verilib.

Sonda qonaqlara Lənkəran xalısı hədiyyə edilib.

“Xalq qəzeti”