Ötən il "Xalq kompyuteri" layihəsinin növbəti mərhələsinə start verilmişdir. Bu mərhələ orta məktəb müəllimlərinə aid edilirdi. Lakin 2010-cu ilin I rübündən etibarən layihəyə ali məktəb müəllim və tələbələrinin də cəlb olunmasına başlanılıb.
Qeyd edək ki, "Xalq kompyuteri" layihəsi Azərbaycan Rabitə və İnformasiya Texnologiyaları Nazirliyi, Azərbaycan Təhsil Nazirliyi, HP və Microsoft şirkətləri tərəfindən reallaşdırılır. Layihənin operatoru "Bestcomp Group" şirkətidir.
Hələ ötən ilin noyabr ayında bu haqda açıqlama verən "HP Azərbaycan" şirkətinin biznes inkişafı üzrə meneceri Rasim Bəxşi bildirmişdi ki, 2010-cu ilin yanvar ayından etibarən layihə çərçivəsində ali məktəb müəllimlərinə və tələbələrə kompyuterlər təqdim edilməsi planlaşdırılır. Sözsüz ki, kompyuterlərin qiyməti dəyişməmiş, konfiqurasiyaları isə gücləndirilmişdir.
Bununla yanaşı, layihədə iştirak etmək üçün iki şirkət - "Symantec" və "KÜR" təşəbbüs irəli sürüb. Belə ki, birincisi "Norton Antivirus" proqramlarını layihə çərçivəsində güzəştli şərtlərlə (ayda 35 qəpik), yerli zavod isə 1 və 4 portlu ADSL modemlərini müvafiq olaraq ayda 2,8 manat və 3,5 manat ödəməklə almağı təklif edirdi.
Bundan başqa, layihə çərçivəsində kompyuter alanlara 1 aylıq pulsuz internet xidmətləri təqdim edilir. "Bestcomp Group" şirkəti tərəfindən 3, 6 və 9 ay ərzində kompyuterin dəyərini ödəyənlərə müvafiq olaraq çoxfunksiyalı printer, printer və flash-kart hədiyyə olunur.
Layihə bir sıra mühüm dövlət proqramlarına, o cümlədən "Elektron Azərbaycan" Dövlət Proqramına və "2008-2012-ci illərdə Azərbaycanda təhsil sisteminin informasiyalaşdırılması üzrə Dövlət Proqramı"na tam uyğundur.

M.MÜKƏRRƏMOĞLU, "Xalq qəzeti"