Azərbaycanda qədim dillər üzrə elmi-tədqiqat laboratoriyaları yaradılacaq. Bu barədə APA-ya Azərbaycan Milli Elmlər Akademiyasının Humanitar və İctimai Elmlər Bölməsinin akademik-katibi Kamal Abdulla məlumat vermişdir.

Onun sözlərinə görə, yaxın illərdə Azərbaycanın qədim dillər üzrə mütəxəssisləri xarici ölkələrdə təhsil alıb qayıtdıqdan sonra bu proses həyata keçiriləcək: “Hazırda qədim dilləri öyrənən mütəxəssislərin xaricə göndərilməsi çox ciddi şəkildə gündəmdə dayanır. Artıq bu mütəxəssislərin bəziləri ilə danışıqlar aparmışıq. İlkin olaraq 2-3 mütəxəssis göndəriləcək. Bu məsələ razılaşdırılıb. Hazırda onların təhsil alacaqları elmi mərkəzlər müəyyənləşdirilir. Bu, İtaliyanın, İngiltərənin, Sankt Peterburqun və ya Yunanıstanın qədim dilləri öyrənən mərkəzlərindən biri ola bilər. Həmin mütəxəssislər fərdi proqram əsasında qədim latın, yunan, şumer, pəhləvi və digər dilləri öyrənəcəklər. Bu dilləri öyrənəcək adamlar artıq dilçilik istiqamətində formalaşmış mütəxəssis olmalıdır.  Onlar 2-3 ilə dili dərindən öyrənib qayıtdıqdan sonra qədim dillər üzrə elmi-tədqiqat laboratoriyaları yaradılacaq”.

 K. Abdulla demişdir ki, indiyədək Azərbaycanda nə Dilçilik İnstitutunda, nə digər elmi qurumlarda qədim dillər üzrə mütəxəssislər olmamışdır: “Bundan sonra bölmə çox ciddi olaraq bu işlə məşğul olacaq. Hökumət bu işdə AMEA-ya yardım edəcək. Artıq Elmin İnkişafı Fondu və Təhsil Nazirliyi də qədim dillər üzrə mütəxəssislərin xaricə göndərilməsinə öz razılıqlarını bildirmişlər”.