Yanvarın 10-da Türkmənistan Respublikasının ölkəmizdəki fövqəladə və səlahiyyətli səfiri Toylu Komekov Azərbaycan Turizm İnstitutunun qonağı olmuşdur. ATİ-nin rektoru, tarix elmləri doktoru, professor Cəfər Cəfərov cənab səfiri salamladıqdan sonra institutun fəaliyyəti barədə ətraflı məlumat vermişdir.

O qonağın və toplantı iştirakçılarının nəzərinə çatdırmışdır ki, Türkmənistan–Azərbaycan münasibətlərinin kökündə qarşılıqlı hörmət, bərabərliyə və inkişafa əsaslanan dostluq və qardaşlıq münasibətləri dayanır. Bu münasibətlər çoxəsrlik milli ənənələrə söykənir. Türkmənistanın Bakıdakı böyük elçisi 2013-cü ildə ilk tanışlıq görüşünə Azərbaycan Turizm İnstitutundan başlamaq istəyinin ATİ rəhbərliyi tərəfindən razılıqla qarşılandığı üçün təşəkkür etmişdir. O, məlumat üçün bir daha bildirmişdir ki, Türkmənistan Xəzər dənizinin cənub qərbində, Turan ovalığında yerləşir. Avropa ölkələri ilə Çin və Hindistana gedən quru yollarınıın üzərində qərarlaşıb. Ölkəsində ilin 290 günü göy üzünə bulud gəlməz. Dünyanın 52 böyük ölkəsi sırasında yer alan Türkmənistan 5 vilayətdən ibarətdir. Paytaxt Aşqabadda onlarla sənaye, elm-təhsil müəssisəsi və s. fəaliyyət göstərir. Türkmənistan ali təhsil müəssisələrindən bəziləri ilə Bakı Dövlət Universiteti, Azərbaycan Diplomatiya Akademiyası arasında ikitərəfli əməkdaşlıq müqaviləsi qüvvədədir.

T. Komekov demişdir ki, Türkmənistan iqtisadiyyatında neft-qaz sənayesinin mühüm yer tutmasına rəğmən ölkə həm də turizm infrastrukturu baxımından da əhəmiyyətlidir. Türkmənistanda turizm 3 istiqamətdə, xüsusilə müalicəvi turizm inkişaf etmişdir. Səfir müalicə turizminin ölkə büdcəsinə mənfəət gətirdiyini diqqətə çatdırmaqla ATİ-yə ziyarətini institutla, turizm sənayesi üçün yüksək ixtisaslı kadr hazırlığı prosesi ilə tanışlıq məqsədi daşıdığını bildirmişdir. O, Türkmənistanın müvafiq ali məktəbləri ilə ATİ arasında tələbə-müəllim mübadiləsi sahəsində ikitərəfli əməkdaşlıq müqavilələrinin imzalanması, elmi konfrans və tanışlıq görüşlərinin təşkili və keçirilməsində maraqlı tərəf olduqlarını xüsusi vurğulamış, 2013-cü ilin ATİ-dəki ilk görüşünün faydalı olacağına inandığını bir daha bildirmişdir.  Toplantının sonunda səfirin iştirakı ilə xatirə şəkilləri çəkilmişdir.

 “Xalq qəzeti”