Azərbaycan Texniki Universitetinin (AzTU) əməkdaşları Avropa Komissiyasının “Qara dəniz regionunda  tədqiqat və texnoloji inkişaf üzrə yeddinci çərçivə proqramı”nda  həyata keçirdiyi birgə layihələrin müştərək pilot müsabiqəsində iştirak etmişlər.

Universitetdən AzərTAc-a verilən məlumata görə, Avropa ölkələrinin təmsil olunduğu  müsabiqənin qalibləri sırasında  AzTU-nun “Qara dəniz regionunda neft və qazın nəqlində istifadə olunan maşın və mexanizmlərin etibarlılığı və möhkəmliyi” layihəsi də vardır.

Layihənin əlaqələndiricisi, AzTU-nun “Texniki mexanika kafedrası”nın professoru Valeh Baxşəliyev bildirmişdir ki, layihə neft-qaz sənayesinin maşın və avadanlığının keyfiyyət göstəricilərinin yüksəldilməsini və ətraf mühitin çirkləndirilməsinin qarşısının alınmasını nəzərdə tutur.

Rumıniyanın paytaxtı Buxarestdə keçirilmiş beynəlxalq   konfransda V.Baxşəliyev Cənubi Qafqaz ölkələrindən təqdim olunan  bu yeganə layihə barədə ətraflı məlumat vermişdir.

Azərbaycan Respublikasının Prezidenti yanında Elmin İnkişafı Fondunun qoşulduğu bu beynəlxalq qrant müsabiqəsində  Azərbaycan ilə  yanaşı, Almaniya, Bolqarıstan, Rumıniya  və Yunanıstanın  təqdim  etdiyi  layihələr də qalib  hesab edilmişdir.

AzərTAc