Üçcildlik yeni “Azərbaycan tarixi”nin yazılmasına gələn ilin əvvəlindən başlanacaq və bu proses yaxın üç ildə başa çatdırılacaq.

 Bu barədə APA-ya Azərbaycan Milli Elmlər Akademiyasının (AMEA) Tarix İnstitutunun direktoru Yaqub Mahmudov açıqlama vermişdir.

Onun sözlərinə görə, artıq bununla bağlı sənədlərin toplanmasına başlanılmışdır: “Bu, çox ciddi məsələdir. Çünki ölkənin indiyə qədərki tarixində Azərbaycanın itirilmiş torpaqları öz əksini tapmayıb, yalnız indiki Azərbaycan Respublikasının əhatə etdiyi tarix öyrənilib. Tarixi Azərbaycan torpaqları olan indiki Ermənistan ərazisi Azərbaycan tarixinə salınmayıb. Bizim 500 illik Tiflis əmirliyimiz olub. Əbəs yerə deyil ki, Fətəlixan Xoyskinin, Mirzə Fətəli Axundzadənin, Mirzə Şəfi Vazehin qəbirləri Tiflisdədir. Tiflis Azərbaycan mədəniyyətinin mərkəzlərindən biri idi. Bu tarix araşdırılanda məlum olacaq ki, Gürcüstandakı Şah Abbas məscidi və Tiflis əmirliyinin iqamətgahlarının hamısı dağıdılıb. İndi gürcülər Azərbaycanda David Qareci məsələsini qaldırırlar. Onda Azərbaycanın haqqı var ki, öz abidələrinə sahib çıxsın. Azərbaycan digər dövlətdən ərazi istəmir, amma bizim tarixi abidələri bərpa etsinlər. Bu məsələlərə dövləti münasibət olmalıdır”.

 Y.Mahmudov demişdir ki, yeni “Azərbaycan tarixi” yazılan zaman Cənubi Azərbaycanın, Borçalı və Dərbəndin tarixləri də dərindən araşdırılacaq: “İndiyədək bu istiqamətdə xeyli iş görülüb. Gördüyümüz işləri yekunlaşdırmaqdan ötrü ümumiləşdirmələrə başlamışıq. Güman edirəm ki, yaxın üç il ərzində Azərbaycanın mükəmməl tarixini yaza biləcəyik”.